Hezkuntza Sailak hiru espediente ireki dizkio Serunion jatetxe-enpresari, hainbat ikastetxetako menuetan, Langile ikastola barne, jasandako kalitate arazoengatik salaketak jarri ondoren. Espediente horietako baten emaitza 40.000 euroko isuna izan da. Jokin Bildarratz sailburuak esan duenez oraingoz, ez dela «kontraturik» deuseztatu eta, une honetan, Administrazioak «gertatzen ari diren gorabehera guztiak» jasotzen dituela.
Hiru espediente ireki zaizkio enpresari, «ondorio ekonomikoa duten bi», horietako bat amaituta eta asteazkenean jakinarazita, eta 40.000 euroko isuna ezarri zaio Duranako Ikasbide ikastetxean gertatutakoarengatik. Irailaren 22an jangelan zerbitzatutako pasta-plateretan zizareak agertu ziren. Kontratua suntsiarazteko hirugarren espedienteak, «bere denbora daramana», bi hilabete inguru, aukera emango du «eskubideak babesten badu eta benetan justifikatzen bada» kontratua suntsiarazteko. Bildarratz Sailburuaren arabera, «gorabeherak» antzeman dira Hernaniko Langile ikastolaz gain, Durana, Zigoitia eta Murgiako zentroetan.
Helburua Serunionekin kontratu osoa birplanteatzea ote den galdetuta, Bildarratzek esan zuen «kezkatzen dituen lehenengo gauza familiak» direla, eta «kalitatezko zerbitzua ematea». «Oso sentiberak gara gai hauekiko», gaineratu zuen. Hori dela eta, «hortik urruntzen den guztia kezka bat da». «Zentzu horietan, ahalik eta neurri gehien hartu behar ditugu hori errepika ez dadin», esan zuen.
Hala ere, gogorarazi zuen kontratuen lege bat dagoela, bete beharrekoa. «Lege bermatzailea da, eta, jakina, enpresak bere betebeharrak ditu, baina bere eskubideak ere baditu, baita enpresako langileek ere. Hau da, hemen kontu asko hartu behar dira kontuan, baina guretzat, benetan, lehentasuna dena, familiak eta haien seme-alabak zaintzea da», amaitu zuen.
Bi talde sortu dira Langile Ikastolan kontratua eteteko taldea eta eredeu aldaketa lantzeko taldea
Langile Ikastolara oraindik ere Serunion enpresak eramaten du janaria. Ostegunean bilera izan zuten gurasoek ikastolako zuzendaritzarekin. Batzarraren proposamenez, «aurrerantzean jangelako gaiaren inguruan bi talde sortzea erabaki da». Eusko Jaurlaritza-Serunion kontratua eteteko dinamika taldea izango da bat eta bestea izango da eredu aldaketa lantzeko taldea. «Talde hoietako batean parte hartu nahi badezute jarri gelaburuekin harremanetan. Denok batera lortuko dugu!!» adierazi dute.
Arazoak ikasturte hasieratik datoz, baina pasa den azaroaren 10ean gertatu zen erabakia hartzeko pausoa emateko gertaera. Duranako Ikasbide (Araba) ikastolan babarrunekin arazoak somatu zituzten. Babarrunak kendu zituztela jakin ondoren, Serunionek zerbitzatzen dituen Arabako eta Gipuzkoako beste ikastetxe batzuk ohartarazi zituen Hezkuntza Sailak, haien haurrei ez zerbitzatzeko. Hernaniko Langile ikastolak 12:15etan jaso zuen Hezkuntza Sailaren posta. Ordurako jangelako langileek lekaleak jan zituzten.
Langile ikastolako zuzendaritzak mezua jaso bezain pronto, Laubidietan eta Bidebietan erretiratu egin zituzten lehen platerak, «baina gure jangelako begiraleek lehenago jan zituzten babarrun horiek».
Lehen txandakoei arazoa azaldu eta bigarren platera, arraina, zerbitzatu zitzaien eta Laubidietako haur baten platerean har bat topatu zuen haurrak berak. «Enpresari honen berri eman genion baina, badaezpada ere, arraina ez emateko erabakia hartu genuen. Postrea, arrainarekin zetorren tomate entsalada eta ogia jan ahal izan zuten».
Langilek Hezkuntza Sailera beraien kexa eta haserrea adierazi zien eta gurasoei ere berdina egitera animatu zituzten. «Gure haurren eta gure lankideen osasunarekin ez dugu onartuko jolasean aritzea!!! Ez dugu bat bera ere pasatzen utziko!!». Azaroaren 12an elkarretaratzea eta idatzia aurkeztu zuten gurasoek eredua aldatzeko eta kontratua eteteko eskatzen.