Bolada onari segida eman nahi diote Hernaniko talde nagusiek, asteburu honetan. Garaipenak kateatzetik datoz biak, eta etxetik kanpo saiatuko dira irabazten gaurkoan.
Añorgan jokatuko dute Euskal Ligako neskek, iluntzeko 19:30etan hasita. Liga hasiera borobilari, beste kapitulu bat gehitu nahi diote, zazpigarren garaipena lortuta, goiko postuetan mantendu eta amesten jarraitzeko: bosgarren daude, 20 punturekin, liderrak baino bost gutxiago. Aldiz, sailkapeneko azkeneko postuetan dago Añorga, zazpi punturekin.
Ohorezko Erregionaleko mutilek Oiartzunen zelaian jokatuko dute gaur, 15:30etan Karla Lekuonan. Kontrario gogorra da talde oiartzuarra, sailkapenean berdeak bi puntu gutxiagorekin dagoena. Baina sasoi puntu onean dago Hernani, eta hori baliatu nahi du hiru puntuak ekartzeko.
Mundarrok, bestalde, irabazi beharreko partidua dauka etxean, Urnietaren kontra; gaur 15:30etan, Zarkumendegin. Garaipena lortuz gero, bigarren postura ere igo litezke moreak.