Hernaniko futbol talde nagusiek jardunaldi ezin hobea izan dute asteburuan. Zubipen jokatu zituzten partiduak larunbat arratsaldean. Ohorezko Erregional mailako mutilek 5-0 irabazi zuten Eibarren aurka, eta segidan, Euskal Ligako neskek jarraipena eman zioten gol festari: 3-0eko garaipena lortu zuten, San Ignacio talde bilbotarraren aurka.
Arratsalde borobila bizi izan zen Zubipen. Lehenengo mutilen txanda iritsi zen. Eibar indartsua zuten aurrez aurre, baina hernaniarrek denboraldiko partidu hoberena jokatu zuten, eta erraz gainditu zituzten eibartarrak. Garaipen garrantzitsua da txuri-berdeentzat, eta sailkapen nagusian goruntz begira jarri dira, seigarren postuan. Lehenengo postuak ez dauzkate urruti, gerturatu egin baitira.
Euskal Ligako neskak ez dira aspertzen partiduak irabazteaz. Amesteko denboraldia ari dira osatzen, eta seigarren garaipena lortu zuten (3-0), San Ignacioren aurka. Bilbotarrak eta hernaniarrak berdinduta zeuden sailkapenean, 17 punturekin, baina etxekoak askoz ere gehiago izan ziren, eta ongi menderatu zuten kontrarioa. 20 punturekin, bosgarren postuan daude sailkatuta, lidergotik 5 puntura.
Mundarrok 2-0 galdu zuen Oriokoren aurka
Mutilen Erregional Preferentean, Mundarrok 2-0 galdu zuen Oriokoren aurka. Sailkapenean elkarrengandik gertu zeuden bi talderen arteko partidua izan zen, eta oriotarrak nagusitu ziren markagailuan. Moreak gogotik saiatu ziren, baina etxekoek lortu zituzten hiru puntuak.
Emaitza honekin, Mundarro bosgarren postura jaitsi da, 16 punturekin, eta Oriokok aurreratu du 17 punturekin. Sanpedrotarra da liderra, 22 punturekin.