Asteburu honetan Mundarro izango da etxean jokatuko duen bailarako futbol talde nagusi bakarra. Gaur arratsaldean jokatuko dute moreek zortzigarren jardunaldiari dagokion partidua, arratsaldeko 16:00etan hasita, Axularren aurka. Etxetik kanpo irabaztetik datoz astigartarrak, ondo jokatu zuten Usurbilen aurka, eta egindako lanari jarraipena eman nahi diote Zarkumendegin. Gaurko aurkaria sailkapeneko azken sailkatua izango da; Axularrek oraindik ez du partidurik irabazi, eta gol gutxien sartu dituen taldea da (6).
Hernaniko taldeei dagokienez, Gasteizen jokatuko du emakumezkoen Euskal Ligako taldeak. Pasa den asteburuko emaitza ikusgarriaren ondoren, partidu guztiak galdu dituen Aranbizkarra taldearen aurka jokatuko dute. 8 jardunalditan 41 gol jaso dituzte arabarrek, eta defentsan dituzten arazoak baliatzen saiatuko dira Hernaniko aurrelariak. Partidua arratsaldeko 18:00etan hasiko da.
Ohorezko Erregional mailako mutilek, berriz, bihar goizean jokatuko dute. Asteazkeneko porrotaren ondoren, haize pixka bat emango dion garaipena bilatuko dute Zubietan. Liga ez du nahi bezala hasi Hernanik eta dexente kostatzen ari zaio erregulartasuna lortzea; orain arte, 9 jardunaldi jokatuta, 3 garaipen, 3 berdinketa eta 3 porrot jaso ditu. Biharko partiduan Deusto izango da berdeen aurkaria; donostiarrek 4 porrot jaso dituzte azken 5 partiduetan, eta sailkapenaren beheko postuetan hasi dute denboraldia.