Partidu asko jokatuko dituzte CD Hernaniko pelotariek asteburu honetan. 33 norgehiagoka izango dira maila guztien artean, eta partidu garrantzitsu batzuk tarteko.
Erabakigarria izango da gaurko partidua Jon Jara eta Josu Altuna seniorrentzat. Gipuzkoako Txapelketako 3. mailan lehiatzen ari da Hernaniko bikotea, eta gaur jokatuko dute sailkapen faseko azken partidua, Orion, Aranburu-Albeniz bikotearen aurka.
Sailkapena lortzea ez da erraza izango hernaniarrentzat; izan ere, ez dute nahikoa izango partidua irabaztearekin. Tanto diferentzia ere begiratu beharko dute, eta gutxienez 3 puntuko aldearekin irabazi behar dute partidua txapelketaren azken fasea jokatu ahal izateko. 19:30etan hasiko da norgehiagoka.
Finaletik kanpo geratu da Exposito
Promozioko lau t'erdikoan, asteazkenean jokatu zuen finalerdia Hodei Exposito astigartarrak. Expositok ez zuen partidua hasi bezain ondo amaitu, eta 22-21 galduta Egigurenek lortu zuen finalerako txartela.
Hiru pala partidu jokatuko dira asteburuan
Palan binakako Gipuzkoako Txapelketako partiduak jokatuko dira asteburu honetan. Gaur goizean, 11:00etan hasita, Ikaztegietan jokatuko dute Iriondok eta Tolaretxipik, Intxurreren aurka. Bihar nagusien eta jubenilen partiduak jokatuko dira Hernaniko pelotalekuan.