Euskalgintzaren Kontseiluak deituta, manifestazioa izango da gaur arratsaldean euskeraren aurkako oldarraldi judiziala salatzeko. Bilboko Euskalduna izango da protestaren abiapuntua, arratsaldeko 17:00etan hasita.
Kontseilutik azaldu dute «argi dagoela» orain artekoak «ez direla sententzia isolatuak, baizik eta botere judizialetik hizkuntza-politika aurrerakoiak mugatzeko eta herritarron hizkuntza-eskubideak murrizteko joera gorakorra: oldarraldi bat». Horregatik, bat egiteko gonbidapena luzatu diete «berdintasun sozialean sinesten duten eragile eta norbanako guztiei».
Bailarako euskalgintzak bat egin du deialdiarekin
Urumea bailarako euskalgintzak ere bat egin du deialdiarekin. AEK-k autobusak antolatu ditu bertara joateko; Hernanin, arratsaldeko 15:10etan izango da irteera, Atsegindegitik; eta Astigarragan, 15:25etan Pilotari kaleko biribilgunetik.