Hileko azkeneko asteartea izanik, gaur egingo dute Plenoa, ohiko deialdian, Astigarragako eta Hernaniko udalek.
Ohi bezala, Hernaniko Udalak jarri du hitzordu goiztiarrena, arratsaldeko 18:00etan hasita. Zazpi puntu izango dituzte lantzeko. Horien artean daude, besteak beste, 2023ko Hernaniko Udaleko eta Ereñotzuko Toki Entitate Txikiko bigarren ordainsariaren igoera onartzea; Udalaren eta Kabia foru organismo autonomoaren arteko lankidetza hitzarmenaren aldaketa-gehigarria onartzea; eta PSE-EEren udal taldeak aurkeztutako mozioa: 'Klima babeslekuen mozioa eta espazio publikoen birnaturalizazioa'.
Ordubete beranduago hasiko du Plenoa, 19:00etan, Astigarragako Udalak. Bederatzi puntu landuko dituzte haiek, eta honakoak dira esanguratsuenak: 2023ko soldata igoera; 2024 urterako autotaxi zerbitzuaren tarifak; eta Astigarragako herri baratzeen emakida eta erabilera arautzeko erregelamenduaren hasierako onarpena.
Eta horiekin batera, bi mozio: bata, Euskadiko Kaleratzeak Stopek aurkeztutakoa, Astigarragan alokairuaren merkatuko prezio garestiek tenkatutako eremuak definitzeari buruzkoa, eta horietan Estatuko Etxebizitzaren Legeak ezartzen dituen mugak gauzatzeari buruzkoa; eta bestea, UEMAk aurkeztutakoa, euskeraren aurkako oldarraldiari buruzkoa.