Egun ederra izan zen larunbatekoa, CD Hernaniko esku pelota sailarentzat. Guraso Batzordeak antolatuta, Pilota Eguna ospatu zuten bigarrenez, eta «jardunaldi ahaztezina» bizi izan zuten esku pelotari, senide eta zaleek.
Kalejiran eman zioten hasiera egunari, trikitilariekin; eta Tilosetara iritsi ziren eguerdian: klubeko 80 esku pelotariak aurkeztu zituzten bertan, pelota eskolakoetatik seniorretara. Barrene herrikoia ere egin zuten segidan, Tilosetako frontoian. Eta ondoren, Atsegindegira mugitu ziren denak, festari segida emateko: paella ederra bazkaltzeko, toka lehiaketa, eta disko festarekin dantzarako tartea.
Baina eguna borobiltzeko, noski, ezin esku pelota partidurik falta: bertso-pelota desafioa jokatu zuten Tilosetan, iluntzean, Hernani eta Goizuetaren artekoa. Goizuetarrak nagusitu ziren, bi partiduak irabazita: Araitz Legarreta-Alize Sagardui eta Beñat Apezetxea-Antton Apezetxea jokoan, eta Aitor Mendiluze botilero lanetan. Hernaniarren ordezkari izan ziren Esnal-Zabala eta Apaolaza-Altuna, Maialen Lujanbio botilero zutela.