Joan den ostegunean argitaratu zuen Gipuzkoako Foru Aldundiak, GAOn, kirol ekipamenduen planeko 2023-2025 aldirako dirulaguntzen ebazpena. Eta horren arabera, 76.333 euroko dirulaguntza jasoko du Astigarragako Udalak, deialdira aurkeztu zuen ekimena gauzatzeko: Andre Gobadarien ibai parkean kirol ekipamendu berria jartzea, herritarrek bertan kirola egiteko aukera izan dezaten.
Guztira, 8.180.000 euro bideratuko ditu Gipuzkoako Foru Aldundiak dirulaguntza horietara, eta Gipuzkoako udalen 45 ekimen lagunduko ditu diruz.
Deialdi horretara, Hernaniko Udalak ere aurkeztu zituen bi proiektu: Latsunbe auzoko frontoia estaltzekoa, eta Hernaniko kiroldegian rokodromoa egitekoa. Bietan jaso du ezezkoa, ordea, honako arrazoiengatik: frontoiaren kasuan, proiektua hasiera batean ez aurkezteagatik zegokion lerroan, ondoren zuzen aurkeztu arren; eta rokodromoaren kasuan, aurrekontua agortuta zegoelako dagoeneko.