Hernanin bataz besteko errenta pertsonala 21.757 eurokoa da eta 25.840koa Astigarragan

Euskal Estatistika Erakundeak Euskal Autonomi Erkidegoko batezbesteko errenta pertsonala eta errenta erabilgarria argitaratu ditu lurraldeka, eskualdeka eta herrika. Datu horien arabera Hernanin batezbesteko errenta pertsonala, 18 urtetik gorako pertsonena, 21.757 eurokoa da eta Astigarragan 25.840 eurokoa da. Errenta erabilgarriari erreparatuz gero 18.320 eurokoa da Hernanin eta 21.431 eurokoa da Astigarragan.

Errenta Pertsonalen estatistika eragiketak EAEn bizi eta 18 urte edo gehiago dituzten pertsonen errenta zenbatzen du; per capita errenta gordina eta batez besteko errenta pertsonala bezalako aldagaiak eratzen ditu. Aberastasun indibidualaren eta familiarraren banaketa ezagutzeko oinarria da, biztanleriaren zentsu-aldagaiei lotutako datu fiskaletan oinarritzen baita.

Eustatek landutako datuen arabera, EAEko biztanleek 23.313 euroko batez besteko errenta pertsonala lortu zuten 2021ean, hau da, aurreko urtekoa baino %4,3 haundiagoa (970 euro gehiago).

Lurralde-banaketari dagokionez, batez besteko errenta pertsonalik haundiena Gipuzkoakoa izan da (24.341 euro), eta, haren atzetik, Bizkaikoa eta Arabakoa (22.944 euro eta 22.373 euro, hurrenez hurren). 2020garren urtearekin alderatuta, berriz, Gipuzkoan bataz besteko errenta pertsonalak izan duen igoera (%3,5ekoa) Arabakoa eta Bizkaikoa baino txikiagoa izan da (% 4koa eta %5ekoa, hurrenez hurren).

Hiriburuen kasuan, adierazitako aldeak are haundiagoak dira. Izan ere, Donostian bizi diren pertsonen batez besteko errenta (27.558 euro) EAEko batezbestekoa baino 4.245 euro haundiagoa da. Bilbon eta Gasteizen bizi diren pertsonen bataz besteko errentak, berriz, EAEko bataz bestekoaren antzekoagoak dira (23.592 euro eta 22.615 euro, hurrenez hurren.

Gipuzkoan Arama, Gaintza eta Idiazabal dira aberatsenak

Arama, Gaintza eta Idiazabalgo herritarrak dira batazbesteko errenta altuena dutenak Gipuzkoan. Zehazki, hiru udalerri horiek 30.795 euroko, 28.216 euroko eta 27.896 euroko diru-sarrerak izan zituzten, hurrenez hurren. Hala ere, EAEn Arraia Maeztu (36.927 euro), Garai (47.824 euro) eta Getxo (31.303 euro) dira errenta pertsonal altuena duten herriak.

Eskualdeka Plentzia-Mungia da 26.956 eurorekin aurreneko postuan Goierriren aurretik (26.046 euro). Hernani eta Astigarraga Donostialdea eskualdean daude kokatuta eta errenta pertsonala eskualdean 19.861 eurokoa da, Gipuzkoako baxuena eta EAEko bigarren baxuena Durangaldearen aurretik (17.637 euro). 

Euskal Estatistika Erakundeak (Eustat) egindako txostenak argi uzten du aberastasun haundiago hori zuzenean lotzen zaiola industriaren pisuari. Izan ere, Goierrin ArcelorMittal, Ampo, Lau Lagun, CAF edo Irizar bezalako enpresak daude, besteak beste. Urola Kosta ere hurbil dago.

 
Pasaiak eta Errenteriak, 
errenta pertsonal bajuenak

Txanponaren beste aldean daude Pasaia (19.051 euro) eta Errenteria (20.075 euro), batez besteko errentak lurraldeko bataz bestekoaren oso azpitik baitituzte, eta Donostialdea da diru-sarrera txikienak dituen eskualdea (19.861 euro).

Hernaniren tankerakoak diren beste herri batzuekin alderatuta Lasarte Oriaren (21.484 euro) datuak parekoak dira, Arrasaten 23.391 eurokoa da errenta pertsonala, Tolosan 25.339 eurokoa, Zarautzen 26.583 eurokoa. 

Astigarragak 7.417 biztanle ditu eta 1.000 biztanle baino gehiago edo 10.000 baino gutxiago duten herriekin alderatuta datu altuenak ditu eta ondokoak dira datuak: Orio (24.862 euro), Aretxabaleta (25.516 euro), Legazpi (23.441 euro), Lezo (20.956 euro), Urnieta (21.931 euro), Usurbil (23.511 euro), Urretxu (24.380 euro) eta Lazkao (25.133 euro).

10.000 euroko aldea gizon eta emakumeen artean

'Errenta pertsonal eta familiarraren estatistika' txostenak errentarekin lotutako hainbat datu eta adierazle biltzen ditu, eta agerian uzten du adinaren eta generoaren arabera dagoen alde handia. Hain zuzen ere, Gipuzkoan dago alderik haundiena gizon batek (29.511 euro) eta emakume batek (19.497 euro) jasotzen duten errentaren artean, 10.000 eurotik gora. Adinari dagokionez, errenta haundiagoa da adinean gora egin ahala, 55-59 urtekoen taldera iritsi arte. Handik aurrera, behera egiten du biztanleria aktiboaren adin-tarteetatik urrundu ahala.

Gizonen errentaren eta emakumeen errentaren banaketan aldeak agertzen dira. EAEko gizonek 28.360 euroko batez besteko errenta lortu dute, eta emakumeek, berriz, 18.659 eurokoa. Beraz, gizonen errenta pertsonala emakumeena baino 9.701 euro haundiagoa izan da EAEn eta 10.018 euro Gipuzkoan. Alderik haundiena 70-74 urtekoen adin-tartean erregistratu da. Kasu horretan, gizonen batez besteko errenta emakumeena baino 15.000 euro haundiagoa izan da. Aurreko urtean baino 855 euro txikiagoak izan dira 2021ean, baina hala ere ikaragarri haundiak dira. Adin gazteagotan ere arrakala haundia da gizonen eta emakumeen errenta pertsonalean. Esaterako 40-44 urte artean 31.237 eurokoa da gizonen artean eta 22.539 emakumeen artean. Aldea murriztu arren 30-34 urtekoen artean ere 4.326 euroko aldea dago; 23.009 euro gizonek eta 18.783 euro emakumeek.

 
Adinaren arabera, 18-24 urte artean bajuena eta 55-59 urte artean altuena

Adinaren arabera ere aldea dago, baina ez gizon-emakumeen artean bezala. 18-24 urte artekoak dira errenta bajuena dutenak 4.490 eurorekin EAEn eta altuena 55-59 urtekoek dute 29.805 eurorekin. 25-29 urte artekoen errenta 16.069 euro da, beti ere bataz beste. 65-69 urte artekoena 24.915 euroko da, 70-79 artekoena 20.416, 35-39 urte artekoena 23.585 eta 45-49 urte artekoena 29.445.  

Laneko errentak %57 dira Gipuzkoan eta %29,8 
tranferentzietatik

Gipuzkoako guztizko errenta pertsonaletik, %57 laneko errentetatik dator, % 29,8 transferentzia edo prestazio sozialetatik, % 4,5 jarduera ekonomikoetako errentetatik eta % 8,5 kapitaleko errentetatik.

Erdiak baino gehiagok EAEn, %59,5ek bataz bestekoaren azpiko errenta

EAEko biztanleen %59,5ek baino gehiagok batez bestekoa baino errenta txikiagoa dutela, eta 18 urtetik gorako 1,6 milioi pertsonak (%86,3) errenta-motaren bat jasotzen dutela; 2021ean, ordea, %13,7k soilik ez zuten inolako diru-sarrerarik izan.

Familia errentan Donostialdea hobeto

49.921 euroko errenta du eskualdeak, Gipuzkoak 49.144 eurokoa, Astigarragak 50.659 eurokoa eta Hernanik 43.323 eurokoa.

Errenta pertsonala norbanakoen errenta izaten da eta familia errenta berriz familia batek duena. Guztizko familia errenta kalkulatzeko, familiako kideen errenta pertsonalak gehitzen dira, adingabeenak barne. EAEko familia guztien batez besteko diru-sarrerak batez besteko errenta pertsonala halako bi izaten dira gutxi gorabehera.

Datuak errenta pertsonalaren ildotik doaz. Astigarraga Gipuzkoako bataz bestekotik gora kokatu zen 2021ean, 50.659 eurorekin eta erabilgarri 42.016 eurokoa izan zuen famili bakoitzak. Hernanin famili errenta 43.323 eurokoa izan zen eta erabilgarria 36.474 euro, Gipuzkoako atzealdean kokatuz.

EAEko batez besteko familia errenta 47.005 eurokoa izan zen 2021 urtean. Lurraldeka, kasu honetan ere, Gipuzkoa izan zen familia-errentarik haundieneko lurraldea, 49.144 eurorekin, eta haren atzetik Bizkaia eta Araba kokatu ziren (46.534 euro eta 44.057 euro, hurrenez hurren). Hiriburuei dagokienez, Donostiak izan zuen familia errentarik haundiena (55.564 eurokoa), eta haren atzetik Bilbo eta Gasteiz kokatu ziren (47.021 euro eta 44.232 euro, hurrenez hurren).

Eskualdeka Donostialdearen gorakada nabarmentzekoa da errenta pertsonalarekin alderatuz. 19.861ekoa bazen, Gipuzkoako txikiena, familiarrean 49.921ekoa da, Gipuzkoako bigarren altuena eta EAEko laugarren altuena.

Bestalde, familia errentetan aldeak agertu ziren berriz ere hartzaile nagusiaren sexuaren arabera. Hartzaile nagusia gizona den kasuan, familien batez besteko diru-sarrerak 51.548 eurora iritsi zen, eta gehienak errenta-maila ertain edo haundietan kokatu ziren. Hartzaile nagusia emakumea den kasuan, berriz, batez besteko familia errenta 40.465 eurokoa izan da, eta beheko mailetan kokatu da. Familia horien %7,7 9.001-12.000 euroko mailan kokatu dira. Familien %2,3k ez zuten diru sarrerarik izan.