«Eskualdeko pertsonen gizarteratzea, prestakuntza eta ibilbide soziolaboralak sustatzeko helburuarekin», bi programa berri jarri ditu martxan Beterri-Buruntza mankomunitateak: 'Auzolanberri, mendeko pertsonentzako arreta eta zaintza'; eta 'Gure artean, emakumeak: talentuak eta aukerak'.
Astigarraga, Hernani, Andoain, Lasarte-Oria, Urnieta eta Usurbilgo udalek osatzen dute mankomunitatea, eta enplegu sozialeko programaren barruan jarri dituzte martxan bi egitasmoak. Aurrenekoa, 'Auzolanberri', lan prestakuntzari dagokio, eta Gipuzkoako Foru Aldundiak sustatzen duen 'Elkar-ekin' programaren baitan abiatu dute. Horrekin, 'Mendeko pertsonei gizarte erakundeetan gizarte eta osasun arreta' profesionaltasun ziurtagiria jasoko dute partehartzaileek, 370 ordukoa; eta prestakuntza osagarria jasoko dute, enpresetan praktikaldi bekatuak eta kontratazio dirulaguntzen bidezko laneratze prozesuak ahalbidetzen dituena. Urritik martxora izango da 'Auzolanberri' proiektua, goizeko ordutegian; eta Erroka elkarteak gidatuko du, 27 poligonoan dauzkan instalazioetan. Infromazio gehiago jasotzeko, 943 47 40 83 telefonora deitu daiteke, edo enplegu_soziala@beterriburuntza.eus helbidera idatzi.
Bigarren proiektua, 'Gure artean, emakumeak' izenekoa, «inklusio baliabidea» da, eta Andoainen burutuko dute, Gazte Lokalaren egoitzan. Irailetik abendura izango da programa, eta helburu izango du «emakumeentzako espazio seguru bat sortu, behar ezberdinak dituzten emakumeen arteko sarea eraiki, eta esperientzia berriak ahalbidetzea», azaldu dutenez.
Horretarako, astean hirutan biltzeko aukera proposatu diete partehartzaileei, «helburu profesionala eta ibilbide soziolaboralak lantzen hasteko, oinarrizko digitalizazioa, inguruaren ezagutza eta abar jorratuz». Kasu honetan ere, bi bide jarri dituzte aukeran, harremenatarako: 604 553 769 telefonoa, eta enplegu_soziala@beterriburuntza.eus helbide elektronikoa.
Beterri-Buruntza mankomunitateak adierazi du, bi programa horiek erantzun bat eman nahi dietela «lan gizarteratze ikuspegitik gure eskualdeak eta gizarteak dauzkan beharrei; besteak beste, zaintza lanetan ari diren pertsonen baldintzak hobetuz, gehienbat emakume migranteak. Profesionaltasun ziurtagiriak erantzun eraginkor bat eskaintzen du, prestakuntza arloan. Horrez gain, aurretiko lanketa bat ere beharrezkoa da, datuetan inbisibilizatuta dauden emakumeei espazio seguru bat eskainiz, haien sozializazioa eta ibilbide soziolaboraletan sarbide bat ahalbidetuz».