Ikasturte berria hastearekin batera, mendi lasterketen denboraldiari ere ekin diote Urumea bailarako korrikalari askok; eta hasiera gozoa izan dute, gainera. Gautegiz-Arteagako mendi lasterketan (17 km), esaterako, garaipena lortu zuen Araitz Irazu hernaniarrak (1:56:22).
Aldiz, Idiazabalgo Axari Trailen eman zion hasiera Agerre Mendi Lasterketa Taldeak, denboraldi berriari; eta sasoi betean ekin zioten taldeko korrikalariek. Proba motzean (16 km), erakustaldia emanda nagusitu zen Anartz Artola hernaniarra. Lesio baten eraginez, sei hilabetez egon da geldirik, eta aurreneko lasterketa zuen. Laugarren kilometroan egin zuen ihes, eta lau minututik gorako aldearekin nagusitu zen, probaren errekorra lortuta (1:11:42). Lasterketa berean, 43garren izan zen Julen Goikoetxea hernaniarra (1:35:44), 107garren Iñaki Etxenike herrikidea (1:55:12), 136garren Andoni Larralde goizuetarra (2:10:28), eta 149garren Txarli Gomez astigartarra (2:19:44).
Proba luzean (25,4 km), berriz, Ander Amonarriz hernaniarra aritu zen onenen pare, maila haundiko lehiakideekin: podiumera igo zen, bigarren sailkatuta (2:11:53), Walter Becerraren atzetik (2:09:45). Lasterketa berean, aurreko postuetan izan ziren beste hiru hernaniar ere: Xabat Alonso 13garren (2:26:08), Aitor Urruzola 23garren (2:35:14), eta Jon Murua 27garren (2:39:04). Aitor Lizaso astigartarra, berriz, 108garren izan zen (3:38:46).
Beste proba batzuetan ere izan da bailarakorik. Mikel Rosell hernaniarra, adibidez, 17garren izan zen Atxondoko Sorginen Lasterketan (21 km), 2:32:03 denborarekin; eta Covaledako (Soria) Desafío Urbión proban (37 km) 79garren izan zen Hodei Lujanbio goizuetarra (4:59:44).
Ander Amonarriz, Espainiako Txapelketan igande honetan
Azkeneko urtean erakutsitako mailak saria izan du Ander Amonarrizentzat, eta kilometro bertikalen Espainiako Txapelketa lehiatuko du igande honetan, Euskal Selekzioak deituta. Huescako Villanúa herrian izango da proba, 08:00etan hasita.
Anartz Artolak, bestalde, Golden Trail National Series ligako proba bat jokatuko du urriaren 1ean, Katalunian: Salomon Ultra Pirineuko 21 kilometroko lasterketan ariko da hernaniarra.