Irrikaz betetako astea izan ohi da arraun munduan, Kontxako Banderaren bi igandeen artekoa; baina bereziki gogotsu daude arraunlariak eta zaleak, oraingoan. Izan ere, inoizko Kontxako estropadarik parekatuena izan zen aurreko igandekoa, emakumezkoetan zein gizonezkoetan; eta inoiz baino irekiagoa dago lehia, biharko. Bost segunduren tartean daude aurreneko lau traineruak, bi kasuetan: Tolosaldea, Arraun Lagunak, Donostiarra eta Orio emakumezkoetan; eta Urdaibai, Hondarribia, Donostiarra eta Orio gizonezkoetan.
Dena dago erabakitzeko, biharko bigarren estropada horretan: goizeko 11:00etan hasiko da emakumezkoena, eta eguerdiko 12:00etan gizonezkoena. Eta bi kasuetan, banderaren lehian ariko dira Urumea bailarako arraunlariak, zazpi guztira.
Aurrena, emakumezkoetan, garaipena lortzen saiatuko dira Eider Barba hernaniarra, Oriorekin (4,66 segundura daukate Tolosaldea); eta Uxue Alberdi hernaniarra eta Nahikari Qian Artano astigartarra, Donostiarrarekin (Tolosaldearekin 2,16 segundu galduta). Ohorezko txandan ariko dira haiek. Aurretik, lehenengo txandan, ahalik eta postu onena lortzen saiatuko dira beste hainbat hernaniar: Hibaikako Jone Pastor, Garazi Arabiotorre, Ihintz Larrañaga eta Nora Urbe; eta Hondarribiako Miren Garmendia eta Maider Perez. Bosgarren eta seigarren daude bi traineru horiek oraingoz, hurrenez hurren.
Eta ondoren, gizonezkoetan, Donostiarra traineruarekin ariko dira bailarakoak, bandera astindu nahian: Ander Balda astigartarra, eta Xabat Pastor, Iker Imaz eta Jon Iruretagoiena hernaniarrak. 4,19 segundu kendu behar dizkiote Urdaibairi, eta 2,94 segundu Hondarribiari. Lehenengo txandan, berriz, Ivan Lopez hernaniarra ariko da Ondarroarekin, zortzigarren postutik gora egin nahian.