Gero eta ohikoagoak dira Urumea bailarako herritarrak, rally probetako kotxeetan piloto edo kopiloto gisa. Eta horren adibide da Lesakako Rallysprinta, joan den larunbatean jokatu zena: bailarako lau lagun aritu ziren bertan: Alain Agirre, Maitane Oyarzabal eta Yeray Iriondo hernaniarrak, eta Jon Zozaya goizuetarra.
Horien artean, Agirrek lortu zuen emaitzarik onena. Kopiloto lanetan aritu zen, Mattin Villares piloto zuela, Renault Clio batekin; eta bosgarren postuan bukatu zuten. 27:38,600 denbora pilatu zuten, probaren lau tramoak batuta. Azkeneko tramoan, hirugarren denbora onena markatu zuten.
Yeray Iriondo, aldiz, piloto gisa aritu zen, BMW E36 kotxearekin, Julen Olaziregi kopiloto zuela. 31:19,100 denboran osatu zuten proba.
Eta proba osatzea lortu zuen Maitane Oyarzabalek ere, Mikel Aizpururen kopiloto gisa, BMW E30 kotxearekin. 35:23,500 denbora lortu zuten.
Jon Zozayak, ordea, proba utzi behar izan zuen. Kopiloto lanetan ekin zion, Aitor Sorozabalekin, Mitsubishi Lancer Evo IX kotxea hartuta; baina ezin izan zuten proba amaitu.
Iván Muñozek eta Gabino Martínezek irabazi zuten Lesakako Rallysprinta, 26:09,800 denborarekin. Joseba Beola eta Jose Luis Iratzoki izan ziren bigarren (26:41,900), eta Daniel Del Villar eta Mikel Arza hirugarren (27:22,200). Hortaz, podiumetik 16 segundura geratu ziren Alain Agirre eta Mattin Villares.
Datorren asteburuan, Aramaioko Rallysprinta
Aste honetan bertan izango dute hurrengo zita: Aramaioko Rallysprinta jokatuko dute datorren larunbatean. Lau txandatan ariko dira, eta eguerdiko 12:00etan hasiko da lehenengo tramoa. Bigarrenari, berriz, 16:00etan ekingo diote.