Iturritxo Elkartea Txapelketaren bederatzigarren edizioa jokatu dute asteburuan, Latsunbeberriko eta Marielutseko Jaietan, Urumea bailarako zortzi bikoterekin; eta honakoak izan dira dira txapeldun: Xuhar Hernandez eta Hegoi Zabala infantiletan, eta Inhar Arregi eta Ekai Bergara alebinetan.
CD Hernaniko 15 esku pelotari eta Umore Onako bat izan ziren partehartzaileen artean. Larunbat goizean jokatu zituzten semifinalak, eta igandean finalak. Eguraldi txarragatik, kiroldegiko frontoian jokatu behar izan zituzten partidu guztiak.
Alebinetan, Arregik eta Bergarak mendean hartu zituzten Xuban Miranda eta Oihan Makatzaga; eta Haitz Labaka eta Adei Esteban nagusitu ziren Ekhi Lopezen eta Aimar Nietoren kontra. Finalean, Arregi eta Bergara gailendu ziren Labakaren eta Estebanen kontra; eta hirugarren postua Mirandak eta Makatzagak eskuratu zuten, Lopezi eta Nietori irabazita.
Infantiletan, berriz, Hernandezek eta Zabalak Maialen Esnal eta Araitz Legarreta menderatu zituzten semifinalean; eta Asier Iglesias eta Aratz Labaka izan ziren beste finalistak, Ekhi Galdosi eta Eneko Oiagari irabazita. Hernandez eta Zabala nagusitu ziren final horretan, eta Galdosek eta Oiagak eskuratu zuten hirugarren postua, Esnalen eta Legarretaren aurrean.
Izenematea zabalik,
CD Hernaniko pelota eskolan
Bestalde, CD Hernaniko esku pelota sailak jakinarazi du, dagoeneko zabalik dagoela izenemate epea, pelota eskolan aritzeko. Atzotik apuntatu daitezke esku pelotan aritu nahi duten neska eta mutil guztiak, irailaren 30era arte. Horretarako, kiroldegiko frontoira joan behar dute, astelehenetik ostiralera arratsaldeko 17:00etatik 19:00etara, eta Rufino Rekalde ordezkariarekin hitz egin.
Bihar jokatuko dira Antiguako Txapelketaren finalak,
eguraldiagatik atzeratuta
Beste hitzordu garrantzitsu bat ere bazuten bailarako esku pelotariek, joan den asteburuan, Donostian. Antiguako Txapelketaren finalak jokatu behar zituzten Beñat Apezetxea eta Antton Apezetxea goizuetarrek, larunbatean; baina eguraldiagatik atzeratu egin behar izan zituzten: euri zaparradek goterak eragin zituzten Antiguako frontoian.
Hori horrela, bihar arratsaldean jokatuko dituzte finalak, 18:00etan hasita. Promesa mailakoan ariko da Beñat Apezetxea, Unax Landa oiartzuarrarekin batera, Iker Egiguren azpeitiarraren eta Aingeru Bernaola mañariarraren kontra. Antton Apezetxeak, berriz, elitekoa jokatuko du, Unai Amiano irundarrarekin; eta Jorge Fernández errioxarra eta Aratz Oliden oriotarra izango dituzte aurrez aurre. Hirugarren partidu bat izango du jaialdiak, eliteko emakumezkoen finala: Leire Garai eta Andrea Capellán, Olatz Arrizabalagaren eta Leire Galeanoren kontra.
Finalak zuzenean ikusteko aukera izango da internet bidez, YouTubeko Antiguako Pilotazaleok kanalean.