Antiguako Torneoko finalerdiak erabakita geratu dira, asteazkenean ligaxkako azken partiduak jokatu eta gero. Urumea bailarako lau pelotarik jokatu zuten, eta hiru sailkatu dira finalerdietara. Txapelketatik kanpo geratu den bakarra Eñaut Lizeaga astigartarra da, promesa mailan, Belokirekin batera. Sailkatu direnak, berriz, Ekain Lizeaga astigartarra eta Antton Apezetxea goizuetarra elite mailan, eta Beñat Apezetxea goizuetarra promesa mailan.
Promesa mailan, Beñat Apezetxeak eta Landak bere bi partiduak irabazi zituzten ligaxkan, semifinaletara sailkatzeko. Eñaut Lizeagak eta Belokik, berriz, azkeneko jardunaldian jokatu zuten sailkapena, Irribarriaren eta Arroitaren aurka; baina 22-5 galdu zuten. Horrekin, eta ligaxkako lehenengo partidua ere galduta, kanpoan geratu dira.
Zorte hobea izan zuen Lizeaga anaietan zaharrenak, Ekainek, elite mailan. Julen Alberdirekin batera, 22-13 irabazi zuen Ander Etxanizen eta Markel Gartziaren kontra, Senarren eta Lazkozen ordezkoak. Zortzi tanto nahikoak zituzten zizurkildarrak eta astigartarrak, bigarren postua eskuratu eta semifinaletara txartela bermatzeko; baina ez ziren horrekin konformatu, eta ezta lidergoa ziurtatzen zieten 18 tantoekin ere. Partidua irabazi zuten, eta erakutsi zuten txapela janzteko hautagai nagusiak direla.
Asteartean jokatuko dituzte finalerdiak
Elite mailan, bailarako finalista bat ziurtatuta dago, lehenengo semifinalean ariko baitira Julen Alberdi-Ekain Lizeaga, eta Unai Amiano-Antton Apezetxea. Datorren asteartean jokatuko dute. Aurretik, promesa mailan, Beñat Apezetxeak eta Landak jokatuko dute finalerdietako bat, Oihan Etxeberriaren eta Lozaren aurka. Arratsaldeko 19:00etan hasiko da jaialdia.