Bi txapel jantzi dituzte Urumea bailarako esku pelotariek, aste honetan. Batetik, asteartean, Carmelo Arguelles Txapelketa irabazi zuen Markel Lizeaga hernaniarrak, Burlatan, Oskoz nafarrarekin batera. Xabier Apaolaza hernaniarra eta Cuairan nafarra izan zituzten kontrario, eta 22-5 nagusitu ziren. Cuairanek agindu zuen atzean hasieran, baina Lizeagak ondo eutsi zion aurrena, eta bera izan zen nagusi peloteoan gero, partiduaren erdialdetik aurrera. Aurrean, berriz, Apaolazak ezin izan zuen Cuairanen hasierako nagusitasuna aprobetxatu, eta errematean biziago ibili zen Oskoz. Ordu erdi exkaxean lortu zuten garaipena, eta denboraldiko 16garren txapela eman dio Lizeagak CD Hernaniri.
Asteko bigarren txapela Ekain Lizeagak lortu zuen ostegunean, Donostiako Aste Nagusiko Txapelketan. Julen Alberdi zizurkildarrarekin batera, elite mailako finala jokatu zuen astigartarrak, Trinitate plazan, Oskozen eta Arangurenen kontra. Oso partidu lehiatua izan zen, eta 22-17 nagusitu ziren, txapela janzteko.