Hautesleku itxura hartua dute jada Urumea bailarako eskolek eta txokoek. Gaur hautatu behar dira datozen lau urteetako Espainiako Kongresuko eta Senatuko ordezkariak. Goizeko 09:00etatik arratsaldeko 20:00etara izango da bozkatzera joateko tartea, eta hortik ordu gutxira jakingo dira emaitzak.
Guztira, 22.667 herritar daude bozkatzera deituta Urumea bailaran; gehienak hernaniarrak dira, 16.229. Festak izan arren, bozkatzera deituta daude astigartarrak (5.696) eta aranoarrak ere (110). Azkenik, Goizuetan 632 bizilagun daude bozkatzera deituta.
Hamabi alderdi politiko izan dira hauteskunde hauetarako zerrenda osatu dutenak Gipuzkoan eta Nafarroan. Hala ere, sei ordezkari irtengo dira Gipuzkoako bozketatik, eta bost Nafarroatik. Senatuko ordezkarien kasuan, Gipuzkoatik eta Nafarroatik lau ordezkari irtengo dira.