Bi jaialdi jokatu dira aurreko egunetan, Jai Alai Summer Season txapelketaren barruan; eta bietan jaso dute porrota Endika Barrenetxea hernaniarrak eta Aritz Juanenea saldiastarrak. Torneoko aurreneko partidua irabazi ondoren (2-0), desenpateko hirugarren setean egin diete ihes hurrengo bi partiduek. Ostegunean, Segurolari eta Ansari aurreneko seta irabazi ondoren (15-6), galdu egin zuten bigarrena (5-15), eta kontrarioek lortu zuten tanto erabakigarria desenpatean (4-5). Lehiatuagoak izan ziren setak larunbateko partiduan, Azpirozen eta Larrañagaren kontra: 11-15 galdu zuten aurrenekoa, eta 15-12 irabazi bigarrena. Baina set erabakigarrian, berriro ere, ihes egin zien garaipenak (3-5). Txapelketako beste bi partidu ere izan dira egun horietan: ostegunean, Azpirozek eta Larrañagak 2-1 menderatu zituzten Aldabe eta Urriza; eta larunbatean, Aldabek eta Urrizak irabazi zuten, Segurolaren eta Ansaren kontra (2-0). Horrela, uztailaren 15eko finalera zuzenean sailkatu dira Azpiroz eta Larrañaga (7 puntu); eta finalerdia jokatuko dute Barrenetxeak eta Juaneneak (6 puntu), Segurolaren eta Ansaren kontra (6 puntu), ostegunean.
B taldeko lehiari dagokionez, semifinalak jokatu dituzte. Larunbatean, irabazi egin zuen Aitor Aiestaran hernaniarrak, Loitegirekin batera, Aritz Zubiri goizuetarraren eta Irazuren kontra (2-1). Eta ostegunean, porrota jaso zuen Oier Apezetxea goizuetarrak, Gurrutxagarekin, Zaldua IIren eta Eskuderoren kontra (0-2). Bi bikote irabazleek jokatuko dute finala larunbatean.