Gaur hasiko du bigarren astea Zikuñaga Papelera Torneoak, Hernaniko kiroldegiko frontoian; eta egunero izango dute zerekin gozatua pelotazaleek, 20 bat partidu jokatuko baitituzte larunbatera bitarte. Astegunetan jaialdi bana izango da egunero, 18:00etan hasita; eta larunbatean bikoitza, 11:00etan eta 17:00etan.
Hiru partidu jokatuko dituzte gaurkoan, hiru kategoriatan. Kadeteetan, Ilunpeko Sarasua eta Azpiazu ariko dira, Bergarako Etxaberen eta Ormaetxearen kontra. Jubeniletan, berriz, Irurtzungo Salaberria eta Salcedo, eta Azkoitiko Etxaniz eta Egaña izango dira aurrez aurre. Eta nagusietan, azkenik, Behar Zanako Lizasok eta Oiarpeko Olaizek jokatuko dute, Oiarpeko Iriarte anaien kontra.
Beste hiru partidu izango dira bihar, Urumea bailarako esku pelotariak tartean direla. Jubeniletan, Julen Deskarga hernaniarrak eta Oihan Legarreta aranoarrak jokatuko dute, Epleko Lizarazuren eta Oiarpeko Leoneten kontra. Eta nagusietan ariko dira Xabier Barandiaran astigartarra eta Josu Altuna hernaniarra, Behar Zanako Aranbururen eta Zumaiako Alkantararen kontra. Aurretik, kadeteetan, Irurtzungo Salaberria anaiek jokatuko dute, Oiarpeko Etxeberriaren eta Zelarainen kontra.
Bolada onari segida eman nahi diote etxeko esku pelotariek, oso emaitza onak lortu baitzituzten aurreko astean. Izan ere, garaipenak eskuratu zituzten Deskargak eta Legarretak, Xuban Iturbek eta Oier Azpeitiak (bitik bi irabazi), Xabier Salaberriak (Pagazpeko Urruzolarekin), Iñigo Urkizuk (bitik bi berak ere, Intxurreko Irazustabarrenarekin), eta Ekhi Osesek (Behar Zanako Otaegirekin).