Atzo goizeko txupinarekin eman zitzaien hasiera Martindegiko auzoko jai bereziei: San Ferminei. Txuri-gorriz jantzita gerturatu ziren auzotarrak plazara, festa giroan murgiltzeko asmoz; eta jendetza bertaratu zen ingurutik, arratsaldean bereziki. Aizkolarien arteko lehia estuarekin gozatu zuten horrela: Malen Barrenetxea auzotarra eta Nerea Arruti Euskal Herriko txapelduna, Itxaso Unsaloren eta Oihana Fernandez de Barrenaren kontra.
Gaurkoan izango dute jarraipena San Fermin jaiek, eta ohiko mobidarekin hasiko dute eguna, auzoan barrena, etxez etxe. Eguerdian ere, jan-edana izango da protagonista, auzotarrak bazkari eder baten bueltan bilduko baitira. Eta nola ez, musika lagun izango dute arratsaldean eta gauean, apar festarekin eta zaldi demarekin batera.
SAN FERMINETAN GAUR
10:30, Mobida
13:00, Goiko aristian oroigarri xume bat «gure artean ez daudenentzat». Tturko familiari eskertza, harreragatik.
14:30, Auzo bazkaria
16:30, Puzgarriak
17:00, Kitadelpare Txarangak bazkalondoa animatuko du.
18:00, Apar festa, Laket tabernak antolatuta
19:30, Arratsaldeko dantzaldi saioa Laiotz taldearekin
22:15, XX. Zaldi dema: Andoni Mendizabal 'Asteasu' eta 'Txibiter' azkoitiarra.
23:30, Dantzaldia Laiotz taldearekin
Ondoren, platano dantza lehiaketa xelebrea