Zapi gorriak soinean Martindegiko auzotarrek, gaurtik igandera bitartean

Zapi gorriak janzteko garaia heldu zaie Martindegiko auzotarrei; izan ere, gaurtik igandera arte ospatuko dituzte auzoko festa maiteak: San Ferminak! Goizetik esnatuko dira Martindegiko auzotarrak auzoko jaiei hasiera emateko asmoz, auzoan zehar kalejira osatuz. Jarraian, goizeko 11:00ak aldera, auzoko hildakoen aldeko meza egingo dute, eta hamaiketako eder baten bueltan bilduko dira segidan, Oialume tabernaren eskutik. Gaur goizeko azken ekintza auzoko txikientzako izango da, haur jolasekin, eta buruhaundiekin.

Arratsaldean, Potxin eta Patxin sudur gorriek bisitatuko dute Martindegi auzoa, eta kolorez beteko dituzte festak. Urtero eskaintzen dute ikuskizun berria, baina pailazoek diote, ikuskizunaren funtsa bera dela: «ikuslea ikuskizunaren parte sentiaraztea, elkarrizketa sortzea, parte hartzea bultzatzea bai jolas eta dantzaren bitartez, eta bide batez gai pedagogiko bat jorratzea. Horretarako gorputz espresioa, musika, malabare, keinu eta abarrez baliatzen gara». Arratsaldeko 17:00etan eskainiko dute emanaldia, auzoko plazan.

Aurtengoan ere Suharri 'Paolla' eta Jokin Urretabizkaia 'Basozabal' izango dira Martindegin.

 

Haurrentzako ekintzak ez ezik, helduentzako jarduerak ere antolatu dituzte gaur arratsalderako, hala nola, LII. Tiro karabina lehiaketa eta herri kirolak. Herri kiroletan, 4 emakume aizkolarien arteko dema osatuko dute, Malen Barrenetxeak eta Nerea Arrutik; Oihana F. de Barrenak eta Itxaso Onsalok. Herri kirolek utziko duten egarria asetzeko, sagardo dastaketa eta pintxoak eskainiko dituzte eta ondorengoak izango dira dastaketan parte hartuko duten sagardotegiak: Zelaia, Oalume Zar, Oiarbide, Etxeberria, Larrarte, Gurutzeta, Petritegi, Larre Gain, Iretza, Artola, Elutxeta, Indioene, Bereziartua eta Mendizabal. Jarraian, tortilla lehiaketako emaitza jakinaraziko dute, eta irabazlea Akelenea Jatetxeak saritua izango da. Gaurko egunari amaiera ederra emateko asmoz, gaueko 22:30etan, Bide Batez taldearen erromerian, gorputzak dantzan jarriko dituzte haurrek, gazteek eta helduek.

Bihar, mobidarekin hasiko dute eguna goiz esnatzen direnek eta baita gautxoriek ere. 10:30etan hasiko dute goizeko ekintza, eta ohiturak ez hausteko, etxez etxe ibiliko dira kalejiran, auzotarrak, musika lagun dutela. Eguerdian, goiko artiistian «gure artean ez daudenak» oroituko dituzte eta Tturko familiari eskertza egingo diote, «ematen diguten harreragatik». Auzo bazkaria ere antolatu dute, eguerdiko 14:30etarako, eta tripak asetu ostean, Kitaldepare txarangak hartuko du lekukoa, larunbat arratsaldea girotzeko. Puzgarriak ere jarriko dituzte txikientzat arratsaldeko 16:30etatik aurrera, eta 18:00etan, beste hitzordu garrantzitsu bat dute etxeko txikiek: apar festa! Aparrarekin jolasean jardun ostean, arrratsaldeko dantzaldi saioak hartuko du protagonismoa, Laiotz taldearekin, 19:30ak aldera.  

Gauerako, XX. Zaldi dema antolatu dute, eta segidan, dantzaldiak jarraituko du Laiotz taldearekin. Ondoren, larunbateko ekintzei amaiera emateko, platano dantza lehiaketa xelebrea egingo dute, eta seguru partehartzaile ugari izango direla platano artean. 

 
Etzi, azkeneko eguna

Auzotarrak ez ezik, bailarako herritar mordoa hurbiltzen da Martindegiko San Fermin jaietara.

 

Etzi amaituko dituzte Martindegi auzoko San Fermin jaiak, eta egun osorako prestatu dituzte ekintzak. Goizean goizetik esnatuko dituzte auzotarrak Astigarragako Txirriskla txistulariek, dianarekin. Eguerdiko 12:30etarako, berriz, euskal festa antolatu dute aizkolariekin, harrijasotzaileekin, bertsolariekin eta trikitilariekin. Aizkoran ariko dira Jokin Urretabizkaia 'Basozabal', Suharri 'Paolla', Xabier Zaldua eta Hodei Ezpeleta 'Bihurri'; aldiz, Jon Unanue 'Goenatxo III' ariko da harrijasotzen. Eguerdiko 13:00etan, mikroa hartuko dute Amets Arzallusek eta Julio Sotok bertso saioa eskainiz, eta 17:00etan hasiko da I.Martindegiko trikitixa jaialdia, ondorengo trikitilariekin: Eider eta Lierni Tolosa; Enaitz Alberdi eta Oibar Olano; Janire Segurola eta Elaia Diaz; Hodei Insausti eta Garazi Lopetegi;  Eider Garro eta Araitz Elizalde; eta  Mikel Lertxundi, Liher Yarza, Xuban Ugalde, Aner Elgarresta, Ander Lertxundi eta Ekhi Barrenetxea. Jarraian bertsolarien bigarren saioa eskainiko dute Amets Arzallusek, Julio Sotok eta Miren Amurizak. Arratsaldean, toka txapelketa nagusia jokatuko dute, eta puzgarrietan zilipurdika ibiltzeko tartea ere izango dute txikiek. 20:00etan, Tolosa ahizpek, Elaia Diezekin batera hartuko dute lekukoa jai giroa jarriz, eta festei amaiera emango diete, hasi ziren moduan, kalejira batekin auzoan zehar.