San Joanak bukatuta, gaur bertan hasiko dira Udaleku Irekiak Hernanin eta Ereñotzun. Haur ugarik hartuko dute parte prestatutako ekintza guztietan, eta herriko kaleak alaitasunez beteko dituzte uztailaren 21era arte. Zehazki, 503 haurrek eman dute izena, eta 69 begirale arituko dira guztia dinamizatzen.
Ordutegiari dagokionez, goizeko 09:00etan hasiko da haurren eguna, Biterin taldeka elkartuta. Ondoren, adin tarte bakoitzeko haurrak elkarguneetara abiatuko dira, eta bertan hasi eta amaituko dituzte ekintzak. Txikien (HH3, 4 eta 5) elkargunea Atsegindegi izango da, Ertainena (LH1, 2) Kiroldegiko sarrera eta Handiena (LH3, 4) Gazteria saila.
Aurten ere ur festa, begirale bila edota Peña Eguna izango dira haurrentzat egun berezienak.
Udalekuak martxan, Astigarragan
Astelehenean hasi zen Astigarragako Udaleku Irekietako lehenengo txanda. Gaur irteera egingo dute haur eta begiraleek, eta bihar herriko txoko ezberdinetan antolatutako jolasekin itxiko dute astea.