Garaipen polita lortu zuen Hodei Lujanbio goizuetarrak, Usurbilen, aurreko igandean: Uxue Trail mendi lasterketa (20 kilometro) irabazi zuen, 1:38:09 denborarekin, Jokin Gijarro zumaiarraren (1:42:02) eta Beñat Bereziartua usurbildarraren (1:42:47) aurretik. Zazpigarren izan zen Jon Ander Olazabal hernaniarra (1:47:50).
Garaipen horrekin, primerako hilabetea borobildu du Lujanbiok: Ereñotzuko Mendi Lasterketa irabazi ondoren, bigarren izan zen Oiartzungo Intxixu Trailen, ekainaren 4an; eta bigarren sailkatu zen Errenteriko Gaztañoko Krosean ere, Uxue Trailen bezperan.
Aurreko asteburuan, bestalde, T3T (43 kilometro) eta T2T (25 kilometro) probak jokatu ziren Tolosan, eta bertan izan ziren bailarako hainbat korrikalari. T3Tn, 19garren izan zen Xabat Pagola ereñotzuarra (4:53:33); eta T2Tn 25garren Xabat Alonso hernaniarra (2:34:23).