Abantailarekin ekin zioten Astigarragak eta Hernanik, Herriarteko Txapelketan, final laurdenetako bueltakoari; baina horri heldu beharrik ez zuten izan: erakustaldia emanda, 3-0 nagusitu ziren biak etxean, eta semifinaletara sailkatu dira.
Ostiralean jokatu zuen Hernanik, Zestoaren kontra, kiroldegiko frontoian; eta hasieratik izan zen borobila jaialdia. Joanekoan galdu egin zuen Mikel Manterolak buruz buru, Rodriguezen kontra; baina etxekoen babesarekin, 20-17 nagusitu zen bueltakoan. Horrela, binaka irabazita ziurtatua zeukan pasea Hernanik, eta halaxe egin zuten Imanol Galartzak eta Iker Zurutuzak, Etxabe eta Odriozola menderatuta (20-17). Hori gutxi balitz, kanporaketa erabakita zegoela, ikuskizuna eman zuen Alain Agirrek banaka zazpi barruan, Odriozolari irabazteko (20-5).
Beste horrenbeste egin zuen Astigarragak, igandean Txomiñenen, Zumarragaren kontra. Lesiotik bueltan, buruz burukoan nagusi izan zen Asier Salaberria, eta 20-13 menderatu zuen Rodriguez, pasea bideratzeko. Eta sailkapena ziurtatu baino gehiago egin zuten astigartarrek, beste bi partiduetan: Mikel Txoperenak eta Beñat Zubiarrainek 20-4 irabazi zieten Agirreri eta Egibururi; eta zazpi barruan 20-9 nagusitu zitzaion Ganix Urdangarin Vianari.
Datorren asteburuan hasiko dute semifinaletako kanporaketa, biek ere etxetik kanpo. Hernanik Mutriku izango du kontrario, Anoetaren kontrako final laurdena irauli ondoren. Astigartarrek, aldiz, oraindik ez dakite Azkoitiaren edo Donostiaren kontra jokatuko duten. Bueltako partiduak atzeratu behar izan zituzten, eta aste honetan zehar jokatuko dituzte. 2-1eko markagailua eta 13 tantoren aldea daukate donostiarrek, oraingoz.