Herriarteko Txapelketaren final laurdenetan ariko da Goizueta azkenean, hori jakiteko itxaron behar izan duen arren. Baztanen kontra galdu zuten goizuetarrek, eta multzoko hirugarren postuan bukatuta, beste multzoetako emaitzen zain geratu ziren. Izan ere, hirugarren sailkatutakoen artean bi onenek egingo zuten aurrera. Horietako bat izan da Goizueta, behin kontuak eginda eta tantoak zenbatuta. Iruñearen kontra ariko dira final laurdenetan, datorren asteburuan, Iruñean. Jardunaldi bakarrera jokatuko dute kanporaketa.
Nafarroako Herriarteko Txikian, aldiz, txapelketatik kanpo geratu da Goizueta.
Ekhi Osesek Gipuzkoakoaren semifinala gaur, Hernanin
Hernanin, bestalde, Gipuzkoako Txapelketaren semifinala jokatuko du Ekhi Oses infantilak, gaur arratsaldean. Lapkeko Landa izango du kontrario, 16:30etan hasita; eta hernaniarra izango da faborito, partidurik ez baitu galdu txapelketa osoan.
Hernanin bertan, Gipuzkoako lau t'erdikoaren final zortzirena jokatuko du Paul Ojuelek, nagusien lehenengo mailan: Behar Zanako Urbietaren kontra, gaur 18:00etan. Eta maila berean, final zortzirena jokatuko du Xabier Apaolazak ere, Oteiza azkoitiarraren kontra, 16:30etan Azkoitian.
Bihar, berriz, Berria Txapelketak hartuko du protanismoa, Hernaniko kiroldegiko frontoian. Izan ere, final laurdenetako lehenengo bi kanporaketak jokatuko dituzte: Lazkaoko Lapke eta Doneztebeko Erreka ariko dira aurrez aurre 10:00etan; eta Gasteizko Txukun Lakua eta Ultzamako Buruzgain 17:00etan.
Lapke iazko txapelduna da faborito aurrenekoan, eta oso parekatuta dago bigarrena. Bietan, maila haundiko pelotariak ikusteko aukera izango dute bertaratzen diren zaleek.