Munduko txirrindularirik onenak pasako dira Urumea bailaratik, igande honetan, Euskal Herriko Itzuliaren hirugarren etapa lehiatzearekin batera. Gaur hasiko da emakumezkoen probaren bigarren edizioa, Etxebarrian; eta hiru etapa jokatuko dira. Markina-Xemeinen izango du helmuga aurreneko etapak; Gasteizen hasi eta Amurrion bukatuko da bigarrena bihar; eta Donostian izango ditu irteera eta helmuga hirugarrenak, etzi.
Azkeneko horretan zeharkatuko du bailara lasterketak. Arratsaldeko 16:13etan hasiko da etapa, eta hasi eta berehala pasako da Urumeatik. Arratsaldeko 16:24ak aldera iritsiko da Hernanira, Sorgintxulotik sartu, Latsunbe zeharkatu eta Zinkoeneatik Astigarragarako bidea hartuta. Eta bost minutu beranduago pasako da Astigarragatik, Martindegitik sartu, Tranbia eta Donostia ibilbideak zeharkatu, eta Pelotari kaletik Perurenarako bidea hartuta.
Guztira, 115 kilometroko etapa osatuko dute, Jaizkibel, Gurutze eta Mendizorrotz mendateak igota. Helmugatik 28 kilometrora dago azkeneko hori, eta bertatik Oriora jaitsiko dira, Donostiarako bidea hartu eta helmugara iristeko.
Puntako tropela izango da Euskal Herriko errepideetan, hiru egun hauetan. Partehartzaileen artean izango dira, aurreko astean Espainiako Vueltan lehenengo bi postuetan bukatu zuten bi txirrindulariak: Demi Vollering eta Annemiek Van Vleuten. Beraiek izango dira proba irabazteko faborito, baina maila haundiko beste txirrindulari asko ere izango dira: Marlene Reusser, Ricarda Bauernfeind, Tamara Dronova, Kasia Niewiadoma, Marta Cavalli, Evita Muzic, Liane Lippert, Olivia Baril, Krista Doebel-Hickok, Veronica Ewers...