Zenbait mendi lasterketa osatu dituzte Urumea bailarako korrikalariek, joan den asteburuan: urrutiago batzuek, gertuago besteek, dinosauruen arrastoei segika edota Larrun mendian gora.
Trail Huellas de Dinosaurio lasterketan hartu zuten parte, Errioxako Enciso herrian, bailarako korrikalari batek baino gehiagok. Proba luzeena osatu zuen Hodei Lujanbio goizuetarrak, 57 kilometrokoa; eta bigarren sailkatu zen, 6:05:12 denborarekin. 15 kilometroko proban, berriz, emakumezko beteranoen artean hirugarren izan zen Ana Rodriguez hernaniarra.
Gertuago aritu ziren bailarako mendi korrikalari gehiago, Berako Mendi Maratoi Erdian. Beti bezain maila haundia izan zuen lasterketak, eta oso aurrean helmugaratu zen Jon Ander Olazabal hernaniarra, 20garren. Bera izan zen bailarako azkarrena, 21 kilometroko ibilbidea 1:56:02 denboran osatuta.