Hernaniko Biteri kultur etxea izango da eszenatoki, bihar arratsaldean, Nerea Gurrutxaga eta Oihana Vesga dantzarien lan berrirako: Erreka ondoan bi gezur emanaldia eskainiko dute estreinakoz, arratsaldeko 19:30etan, Mari Zaunka Kolektiboko kideek. Sarrerak salgai daude oraindik, 8 euroan, kultura.hernani.eus webgunean eta Biterin bertan.
Dantza garaikidea oinarri duen obra eszenikoa da Erreka ondoan bi gezur, 50 minutu ingurukoa. Fikzioa eta gezurra uztartzen ditu kondairen unibertsoan barneratuta; eta kondaira da sormen prozesuaren abianpuntu eta kokaleku. Kondaira propio bat sortu nahi izan dute, fikziozko elementuez gain gizarteko errealitate zuzenetik hartutako elementuak txertatuz. Horrela, egungo narratibak eta egiak kutsatu eta transformatuko dira kondairaren fantasiazko istorioarekin.
'Generorantz' ikuskizuna, larunbatean Erriberan
Astigarragan ere izango da dantza ikuskizunik aste honetan. Izan ere, Generorantz emanaldia eskainiko du Kimuak dantza kolektiboak, larunbat honetan, 20:00etan Erribera kulturgunean. Genero-ikuspegiaren inguruko lanketa originala eta berritzailea egin nahi izan dute, dantza, gorputz mugimendua, interpretazioa, testuak, errezitaldiak eta bertsoak uztartuta.
Euskal dantza tradizionalak izango dira oinarri emanaldian, baina beste dantza diziplinekin lagundu dituzte (garaikidea edota klasikoa, esaterako), koreografiari ukitu berezia emateko.
Sarrerak eskuragarri daude astigarraga.eus webguneko Sarrerak erosi atalean edota Erriberan bertan: helduenak 10 euroan, eta adin txikikoenak 5 euroan. Egunean bertan, ordubete lehenago ere izango da aukera, Erriberako lehiatilan.