Zineaz gozatzeko aukera itzuliko da asteburu honetan bailarako aretoetara. Bina pelikula egongo dira ikusgai Biteriko eta Erriberako aretoetan, ostiraletik astelehenera bitarte.
Biterin Rumba terapia pelikula jarriko dute helduentzat, eta Violeta, el hada traviesa pelikula haurrentzat. Lehenengoa ostiraletik astelehenera egongo da ikusgai, ordutegi ezberdinetan: ostiralean 22:30etan, larunbatean 19:30etan eta 22:30etan, igandean 19:30etan eta astelehenean 16:30etan. Bere alabarekin konektatzeko ahalegin guztiak egingo dituen aita baten istorioa kontatzen du pelikula frantses honek. Sarrerak 4,5 euro balioko du asteburuan, eta 3 euro astelehenean.
Haurrentzako filma larunbatean eta igandean izango da Biterin, arratsaldeko 16:30etan. Maitagarri bat izango da protagonista: «Violeta izeneko maitagarri bat galdu egin da giza munduan. Maitagarrien mundura itzultzeko, Maxie izeneko 12 urteko neska koxkor batekin topo egingo du eta bere benetako patua ezagutuko du».
'Bi arnas' eta 'Lau ahizpa magikoak', Erriberan
Erribera Kulturgunean ere astigartar guztiek gozatzeko moduko eskaintza dute asteburuan. Haurrek Lau ahizpa magikoak pelikula ikusteko aukera izango dute, igandean, 16:30etan. Euskerazko emanaldia izango da, eta sarrerak 2 euro balio du.
Helduentzat, berriz, Jon Mikel Fernandezen Bi arnas dokumentala proiektatuko dute: «Azken bost hamarkadetan tortura eta tratu txarrak sufritu dituzten euskal herritarrak milaka dira. Dokumentalak lau haizetara zabaldu nahi ditu torturaren aurka borrokatu duten herritar anonimo horien guztien istorioak». 19:00etan hasiko da saioa, eta doakoa izango da.