Gazitik eta gozotik izan du asteburuak, Urumea bailarako esku pelotarientzat. Baina bereziki pozgarria izan da emaitza onetako bat: Gipuzkoako Txapelketa irabazi dute Ekhi Oses eta Oier Arsuaga hernaniarrek, infantilen lehenengo mailan. Haiei esker, maila horretan aurrenekoz lortu du txapela CD Hernanik, Gipuzkoakoan.
Azkoitiko Etxaniz eta Segurola menderatu zituzten hernaniarrek, final haundian (18-14). Oso gogorra eta berdindua izan zen partidua, eta maila ederrean aritu ziren lau pelotariak.
Jon Jara eta Iñigo Labaka senior hernaniarrek, bere aldetik, mailari eustea lortu dute, jokatu gabe. Izan ere, lesioak tarteko, ez ziren aurkeztu Alde Zaharra klubeko kontrarioak.
Hernaniko beste bi bikotek, ordea, galdu egin zituzten asteburuan jokatutako finalak. Gipuzkoako Txapelketan, infantilen bigarren mailan, finalaren presioa nabaritu zuten Aratz Labakak eta Lier Zugastik, eta ez ziren bere maila onenean aritu. Hori horrela, 6-18 galdu zuten Intxurreko Garaikoetxearen eta Leoren kontra. Xuban Iturbe eta Oier Azpeitia jubenilek, berriz, oso gaizki ekin zioten Udaberri Torneoko finalari, Lapkeko Kerejetaren eta Erauskinen kontra (0-10). Bere mailan aritu ziren gero, baina ezinezkoa izan zitzaien markagailuari buelta ematea, eta 10-22 galdu zuten.
Nafar Jokoetan, bestalde, binakako txapelketan aurrera egin dute Umore Onako hiru bikotek. Alize Sagardui goizuetarrak eta Araitz Legarreta aranoarrak galdu egin zuten ligaxkako azkena, baina semifinaletara sailkatu dira zuzenean, bigarren bukatuta.
Final zortzirenetara sailkatu dira beste bi bikote, ligaxka multzoko lehenengo postuan bukatuta: Adur Sagardui eta Axel Salaberria goizuetarrak infantiletan, eta Haritz Aranberri eta Jon Larin herrikideak alebinetan. Mikel Zurutuza eta Aiur Apezetxea goizuetarrak, berriz, txapelketatik kanpo geratu dira, alebinen ligaxkan hirugarren bukatuta, azkeneko partidua irabazi arren.