Oso asteburu oparoa izan da, Urumea bailarako mendi korrikalarientzat; bereziki, Hodei Lujanbio goizuetarrarentzat eta Araitz Irazu hernaniarrarentzat. Talaia Bidea mendi lasterketa ezaguna irabazi du Lujanbiok, Donostiatik Hondarribiara bitarteko 31 kilometroak inork baino azkarrago osatuta, 2:20:28 denboran. Podiumean lagun izan zituen Aritz Kortabarria arrasatearra (2:21:56) eta Eneko Agirrezabal segurarra (2:23:04), 2021eko Behobia-Donostiako irabazlea.
Irazuk, berriz, Ereñoko Mendi Lasterketaren podiuma zapaldu zuen, emakumezkoetan hirugarren sailkatuta. 2:36:25 denboran osatu zuen 20 kilometroko ibilbide gogorra, Amelie Le Gall getxoztarraren (2:30:59) eta Sonia Lopez ermuarraren (2:35:39) atzetik.
Bailarako beste zortzi korrikalarik ere osatu zuten Talaia Bidea. Miren Arantxa De La Fuente astigartarra 10garren izan zen emakumezkoetan, 3:29:01 denborarekin; eta Asier Izquierdo herrikidea 38garren sailkatu zen gizonezkoetan, 2:42:02 denborarekin. Beste lau astigartarrek bukatu zuten proba: Ion Ander Egibar (2:56:42), David Trallero (2:58:47), Imanol Egibar (3:07:33) eta Eneko Garmendia (3:31:41). Bi hernaniar ere aritu ziren bertan: Mikel Aramendi (3:05:37) eta Gonzalo Saavedra (3:54:28).
Gabirian ere izan zen bailarako korrikalaririk, Leharrei mendi lasterketaren bi ibilbideetan. Ibilbide luzea (24 kilometro) elkarrekin osatu zuten Aitzol Larrañaga eta Eñaut Jaka astigartarrek, 2:57:00 denboran. Eta ibilbide laburrean (15 kilometro), zortzigarren izan zen Intza Mitxelena hernaniarra, emakumezkoetan, 1:45:46 denborarekin.