Urte asko zeramazkien Umore Onak, Espainiako Kluben Arteko Txapelketa jokatu gabe; eta koxka bajuenetik hasi du bere ibilbidea aurten. Baina erakutsi du ez dagoela txantxetarako: bigarren mailako txapeldun izan da, igandeko finalean Izarra menderatuta. Horrekin, igoera ere lortu dute goizuetarrek, eta lehenengo mailan ariko dira datorren urtean.
Larunbatean jokatu zuten semifinala, Agoizko Toki-Eder frontoian, Urbión taldearen kontra. Eta sendotasun haundiz lortu zuten finalera pasea: buruz buru, Iker Egigurenek 10-3 eta 10-8 menderatu zuen Hernando; eta binaka, Beñat Apezetxeak eta Antton Apezetxeak 10-7 eta 10-6 irabazi zuten, Ekain Lizeaga astigartarraren eta Molinaren kontra.
Eszenatoki berean jokatu zuten finala, hurrengo egunean; eta gogorragoa izan zen erronka, Izarraren kontra. Are gehiago, finala irauli behar izan zuten goizuetarrek. Izan ere, buruz buru galdu egin zuen Egigurenek, Egurenen kontra (9-10 eta 5-10); eta binakakoan garaipena lortu bakarrik ez, tanto alde haundiagoa behar zuten goizuetarrek. Halaxe egin zuten: 10-5 eta 10-7 nagusitu ziren Beñat Apezetxea eta Antton Apezetxea, Riolen eta Iriarteren kontra, tentsio haundiko partiduan.
Promozioko Txapelketatik kanpo, Hodei Exposito
Ez dira albiste onak izan asteburuan, aldiz, profesionaletan. Hodei Exposito astigartarrak galdu egin zuen play-offa, Promozioko Binakako Txapelketaren semifinaletara sailkatzeko. Iñigo Bikuñarekin batera, 18-22 galdu zuen Bakaikoaren eta Morgaetxeberriaren kontra, eta txapelketatik kanpo geratu da.
Datorren asteburuan hasiko da semifinaletako ligaxka, eta bertan ariko da Iker Salaberria goizuetarra, Oier Etxebarriarekin batera. Ostiralean jokatuko dute aurreneko partidua, gaueko 22:15etan Zumarragan, Zabalaren eta Gaskueren kontra. Bakaikoa-Morgaetxeberria eta Larrazabal-Eskiroz dira ligaxkako beste bi bikoteak. Hiru partidu jokatuko ditu bikote bakoitzak, eta bi bikote onenak sailkatuko dira finalera.
Iñigo Labaka eta Aimar Zabala, finalista trinketean
Afizionatu mailara bueltatuta, beste hainbat partidu garrantzitsu jokatu dituzte bailarako esku pelotariek, asteburuan; horietako bi, trinketeko Gipuzkoako Txapelketan, buruz buruko semifinaletan. Eta biak irabazi dituzte. Nagusien bigarren mailan, garaipen haundia lortu zuen Iñigo Labaka hernaniarrak, Epleko Azpirozen kontra (40-35); eta datorren asteburuan jokatuko du finala, Alde Zaharrako Sorondoren kontra. Eta kadeteetan, 30-26 irabazi zuen Aimar Zabala astigartarrak, Behar Zanako Aranbururen kontra. Behar Zanako beste esku pelotari bat, Iparragirre, izango du kontrario finalean, datorren asteburuan.
Urumea bailarako beste bi esku pelotarik ere jokatuko dute Gipuzkoako Txapelketaren buruz buruko finala, datorren asteburuan: Xabier Barandiaran astigartarrak, nagusien lehenengo mailan, Epleko Tabernaren kontra; eta Unax Manterola hernaniarrak, jubeniletan, Intzako Urdanpilletaren kontra.
Lau t'erdikoan bi final aste honetan, Ekhi Osesek
Primerako asteburua izan da Ekhi Oses hernaniarrarentzat ere. Lau t'erdian ari da azkeneko asteotan, txapelketa pribatuetan; eta nolako mailan, gainera. Lizarrako Lau t'erdiko Txapelketaren semifinala jokatu zuen igandean, eta 18-4 menderatu zuen Aurrerako Baleztena. Hori horrela, finala jokatuko du datorren igandean, Behar Zanako Otaegiren kontra. Baina ez du final bakarra izango, Zizurko lau t'erdikoa ere jokatuko baitu hernaniarrak asteburu berean.