Garaipen bat nahikoa ez, eta bi lortu zituen Hodei Lujanbio goizuetarrak, aurreko asteburuan, Angeluko Chiber Trail mendi lasterketan. Larunbatean irabazi zuen aurreneko proba, gaueko lasterketa, 10 kilometrokoa. 38:07 denboran osatu zuen ibilbidea, Piero Ochoa bigarrenak baino 50 segundu azkarrago.
Eta igandean jarri zion errematea, 20 kilometroko lasterketan. 1:18:12 denborarekin nagusitu zen, eta hiru minututik gorako aldea lortu zuen bigarrenarekin; Piero Ochoarekin, berriro ere.
Etxetik gertuago, Lezo-Jaizkibel mendi lasterketan (14 kilometro) aritu ziren bailarako hainbat. Ivan Sorondo hernaniarra izan zen aurrenekoa helmugan, 46garren (1:19:01). Beste bost hernaniar ere izan ziren bertan: Tomas Elorza (1:24:24), Xuban Iturriotz (1:24:24), Andoni Martinez (1:31:55), Ahmed Ben Ali (1:34:41) eta Aitor Urruzola (1:38:57). Ainhoa Romero astigartarrak ere osatu zuen proba (1:42:41).
Irunen eta Zumaian, asfaltoko lasterketak
Mendian ez ezik, asfaltoan ere aritu ziren bailarako korrikalariak. Irungo maratoi erdian aritu ziren hainbat: David Trallero (1:27:25), Sergio Alvarez (1:28:03), Imanol Moro (1:36:43), Eneko Perez (1:46:07) eta Jon Rodriguez (2:09.29) astigartarrak; eta Igotz Vergara (1:24:06) eta Eva Esnaola (1:49:50) hernaniarrak. 10 kilometroko proban aritu ziren beste zazpi korrikalari: Antxon Ezkurdia (50:05), Alex Martin (52:27), Onintza Beldarrain (56:50), Amaiur Tranche (57:03) eta Irati Tranche (57:03) hernaniarrak; eta Sergio Amado (40:32) eta Koldo Goñi (54:52) astigartarrak.
Eta 10 kilometroko ibilbidea osatu zuten beste hainbatek, Zumaiako Herri Lasterketan: Igotz Gabilondo (38:58), Garikoitz Recondo (44:18), Onditz Recondo (44:19), Ander Mariñelarena (55:01) eta Jone Peñagaricano (55:01) hernaniarrek; eta Joseba Lopez (47:48) eta Fran Rivero (49:26) astigartarrek.
Beste hainbat proba izango dira asteburu honetan: UZ Trail, Aiako Mendi Lasterketa, Donostiako Lilatoia, Ibaeta Igoera...