Hernaniko eta Astigarragako Udalek bihar hilabeteari amaiera emateko, otsaileko Plenoak egingo dituzte. Hernanin, arratsaldeko 18:00etan ekingo diote Osoko Bilkurari, pleno aretoan, eta Astigarragan, berriz, ohi moduan, arratsaldeko 19:00etan hasiko da, udaletxeko areto nagusian. Hernanin 10 dira landuko diren gaiak, eta Astigarragan, 11 puntuk osatzen dute gai zerrenda.
Hernaniko osoko bilkuraren kasuan, landuko diren puntu aipagarrienak ondorengoak dira: 2023 eta 2024 ikastaroetako tasak eta prezio publikoak aldatzea; jabetza publikoa okupatzeagatiko tasen aldaketa, hau da, kaleko salmenta postuek ordaindu behar duten kopurua ezartzeko kalkulu aldaketa; eta Bertatik elikatuz laneratze enpresaren egitasmoari dirulaguntza emateko lankidetza hitzarmena.
Astigarragan, aldiz, honakoak dira aipagarrienak diren gaiak: zinegotzi berriaren kargua hartzea; Astigarragako udalean ezkontza zibilen ospakizunak arautzen dituen arautegia; udaletxean hileta edo omenaldi zibilak baimendu eta egiteko ordenantza; eta martxoaren 8ko adierazpen instituzionala, besteak beste.