Olatua hartuta dabil literatura, Urumea bailaran, azkenaldian. Izan ere, liburu aurkezpen sorta ederra antolatu dute asteotan, Hernanin eta Astigarragan. Dagoeneko egin dituzte horietatik hiru. Hernanin, Kulturarteko Plaza Feministan aurkeztu zuen Petare liburua Leire Ibargurenek, urtarrilaren 26an. Eta egun berean, Astigarragan, Erribera kulturgunean izan zen Amets Castrejana hernaniarra, bere ikerlanaren emaitza den liburuarekin: Astigarragako emakumeen historia hurbila, gorputz-praktiken bidez azaldua (XX.-XXI. mendeak). Erriberan bertan, herenegun aurkeztu zuen bere aurreneko nobela Urtzi Leonet astigartarrak: Itzalen Dama eta Patxi Bakallu 1: Herri margotua.
Hori gutxi balitz, beste hiru libururen aurkezpenak daude aurreikusita dagoeneko, Hernanin. Batetik, El sueño de la lechuza liburuaren berri emango du Luis Azorín idazle hernaniarrak, datorren ostiralean, 18:00etan Goiz Eguzkin. Eta bestetik, bi liburu aurkeztuko dituzte martxoan, Plaza Feministan: Quijote en el Congo eta Manual ecofeminista contra el poder corporativo.