Gipuzkoako pistako denboraldi osoan izan da protagonista Tasio Semperena astigartarra, makina bat erakustaldi eskainita. Eta errematea jarri zion aurreko igandean, Gipuzkoako Txapelketen bakarkako probetan. Bost proba lehiatu zituen astigartarrak, junior mailan; eta hirutan lortu zuen garaipena: keirinean, eliminazioan eta puntuazioan.
Beñat Ilzarbe taldekidea menderatu zuen eliminazio probako azken esprintean; Vlad Raresi eta Ilzarberi berari hartu zien aurrea keirinean; eta egun haundia borobiltzeko, erakustaldia eman zuen puntuazioan: bi aldiz lortu zuen itzuli bateko abantaila tropelarekin, eta 10 esprintetatik bederatzitan pilatu zituen puntuak. Horrela, 73 punturekin bukatu zuen proba, Eneko Ortegaren (64 puntu) eta Auritz Mendiaren (33 puntu) aurretik.
Kadeteetan, bestalde, bailarako hiru txirrindularik hartu zuten parte. Bost proba lehiatu zituzten Danel Txapartegi eta Unai Hernandez astigartarrek ere. Txapartegi seigarren izan zen danesa eta keirin probetan. Hernandezek, berriz, keirinean lortu zuen posturik onena, bederatzigarren. Unax Otegi hernaniarrak, bere aldetik, hiru proba lehiatu zituen, eta zazpigarren izan zen eliminazioan.
Azparren anaiek, denboraldi hasiera Saudi Arabian
Errepideko txirrindularitzari dagokionez, hasi dute denboraldia Enekoitz eta Xabier Mikel Azparren anaiek. Elkarrekin lehiatu dute aurreneko lasterketa, aste honetan: Saudi Tour lasterketan egin du debuta profesionaletan Enekoitzek, anaia alboan zuela, Saudi Arabian.
Maila bikainean aritu da Xabier Mikel Azparren, gainera. Bost etapako itzulian, astigartarra onenekin batera ibili da egunero, bereziki laugarren etapan: igoera gogorra zuten azkeneko kilometroetan, eta bigarren taldetxoan sartu zen Azparren, zortzigarren. Horrela, bederatzigarren postua lortu du sailkapen nagusian, eta Enekoitz anaiaren laguntza ere izan du horretarako: azkeneko etapan, atzo, Xabier Mikelek gurpila zulatu zuen helmugatik 27 kilometrora, eta Enekoitzek utzi zion bere bizikleta berehala, sailkapen nagusiko aurreneko 10en artean zeukan postuari eusteko. Gainera, hirugarren izan da gazteen sailkapenean.