Garraio publikoan ere kenduko du maskarillaren erabilera derrigortzen duen neurria, Espainiako Gobernuak. Hala jakinarazi du Carolina Darias osasun ministroak, ostegun honetan. Ministroen Kontseiluak otsailaren 7an onartuko du maskarillaren obligazioa ezabatzea garraio publikoan (trena, hegazkina, metroa, autobusa edota taxia), eta Estatuko Aldizkari Ofizialean (BOE) argitaratu bezain laster sartuko da indarrean. Otsailaren 8an bertan izan liteke hori, horrelako erabakiak hurrengo egunean argitaratzen baitira BOEn.
Erabaki horren barruan ez da sartuko osasun zentroei buruzko obligazioa. Ospitaleetan, anbulategietan, farmazietan eta mota guztietako kliniketan derrigorrezkoa izango da maskarillaren erabilera, oraindik ere.