Sagardotegi denboraldiarekin batera hemen dator aurtengo IX. Bota Bertsoa! ekimena. Urteroko zitari eutsiz, txotx denboraldiarekin batera, Bota bertsoa! bertso-paper lehiaketa txikia antolatu du Dobera Euskara Elkarteak. Aurten, «indarberrituta eta ilusio haundiz» antolatu dutela aitortu dute Doberako kideek. Aurreko urtean 115 bertso inguru jasota, marka gainditzea izango da aurtengo helburua. «Pandemia aurreko zenbakietara itzuli nahi dugu». Horretarako, «jokoa emango duen» gaia aukeratu dute: «Sartzean ondo ginen baina...».
Parte hartu daiteke 23
sagardotegitan, baita emailez eta instagram bidez ere
Aurten ere Hernani, Urnieta eta Astigarragako 23 sagardotegitan izango dira idatzitako bertsoak uzteko kutxak (Lizeaga, Petritegi, Astarbe, Zapiain, Ipintza, Rezola, Gurutzeta, Itxas-Buru, Olaizola, Otsua-Enea, Altzueta, Iparragirre, Elorrabi, Goiko Lastola, Larre Gain, Garin taberna, Oialume Zar, Oyarbide, Zelaia, Akarregi, Rufino, Elutxeta eta Eula). Hortaz, egin beharrekoa da bertsoa osatu norberak nahi duen doinuan eta neurrian, izen-abizenak eta telefonoa jarri, eta papera kutxan sartu. Horrez gain, bertsoa emailez aurkezteko aukera ere egongo da. Horretarako, identifikazio datuak jarri eta bidali bertsoa dobera@dobera.eus helbidera. Ohiko bi modu horiez gain, aurten instagram bidez (@doberaelk) bidaltzeko aukera zabaldu dute. Bertara bideoak, argazkiak edota mezuak bidaltzeko.
Sari banaketa apirilean egingo da eta sari mordoa izango da. Hernaniko bertso eskolako kideek epaituko dituzte. Urtero bezala, bi lagunentzako otorduak eta sagardo kaxak irabazteko aukera izango da, baina baita zenbait ekitaldietarako sarrerak ere.
Non eta noiz egingo den ez dago zehaztuta. Eguraldi ona eginez gero Tilosetan izango da eta euria eginez gero Atsegindegin. Apirilean izango litzateke, baina ez dago eguna jarrita.
Egitasmoari esker oso giro polita sortzen da sagardotegian
Era berean, sagardotegietan giro euskalduna piztu nahi dute Doberak eta Hernaniko bertso eskolak, euskeraren erabileran eraginez; eta euskal kultura ere sustatu eta indartu nahi dute.
Zentzu horretan, nabarmendu dute «oso balorazio positiboa» egiten dutela sagardotegiek urtero: «egitasmoari esker, oso giro polita sortzen omen da sagardotegietan», azaldu dute. 2019an, pandemia aurreko azken edizioan 130 jaso ziren, pasa den urtean 115 eta aurten 130era iritsi nahi da.
Beraz, animatu eta parte hartu lehiaketan, sagarraren, sagardoaren eta bertsolaritzaren kulturaz gozatzeko aukera ederra baita Doberak proposatutakoa. Gogoratu: Sartzean ondo ginen baina... Gaiak jokoa ematen du bertso umoretsuak, biziak eta zuzen bezain okerrak idazteko. Batez ere, okerrak; zuzen sartu arren.