Meltxor, Gaspar eta Baltasar Errege Magoak bailarara iritsiko dira bihar, urtarrilaren 5ean, Ekialde Hurbil eta Urrunetik bidaia luzea egin ondoren opariz josita. Arratsaldeko 18:00etan izango dira Hernanin, umeak bisitatzen kabalgata dotorean eta 18:30etan, Goizuetan.
Pasa den urtean Berriak elkarteak ezin izan zuen Hernanin antolatu, baina aurten berriz ere berreskuratu du kabalgata.
Urbieta kaletik abiatuko da Erregeen Kabalgata, Marielutsetik, Karobi elkartearen ondotik, herrian barrena ibiltzeko, Musika Bandaren eta txistularien laguntzaz. Noski, pajeak ere alboan edukiko dituzte eta goxokiak banatuko dituzte ibilbide guztian zehar.
Urbieta kalea igaro eta gero Izpizua kaletik igoko dira. Segidan, ezkerretara egingo dute, Elkanotik Plazara sartzeko. Andrekaletik Zinkoeneara jaitsi, eta Kale Nagusitik bueltatuko dira Plazara.
Udaletxeko arkupeetan, haurren gutunak jasoko dituzte, eta oparitxo bana ere emango diete hurbildutakoei. Oinetakoak ondo garbituta edukitzea komeni da gaur gauerako Meltxor, Gaspar eta Baltasar etortzen direnerako eta jatekoa ere utzi mesedez.
Goizuetan, kale nagusietan zehar
Arratsaldeko 18:30etan iritsiko dira Goizuetara, eta kale nagusietan zehar elkartuko dira herritarrekin. Guraso Elkarteak antolatu du topaketa eta Erregeen etorrera ekitaldian herritik kanpoko umeek opariak jaso nahi badituzte, Asinkon hartuko dira opariak 16:30etatik 18:00etara.
Egun berezia izaten da Errege bezpera txikienentzat eta oso polita gainontzeko guztientzat ere. Herriko plazara hurbilduko dira betiko ohitura jarraituz eta kale nagusiak zeharkatu eta gero, eguraldi ona bada behintzat plazara joko dute. Txarra eginez gero berriz, pilotalekuan izanen dira denontzat opariak banatzen.
Hernaniko Errege Magoen desfilerako boluntarioak
Errege Magoen desfilean lagundu nahi duten gurasoek, deitu edo WhatsApp bat idatzi dezakete 676 194 803 zenbakira.