Gabon Gauari hutsik egin gabe, Urumea bailarako herrietara egingo dute bisita gaur, Olentzerok eta Mari Domingik. Eta haien etorrerarekin batera, egun bereziari doinua jarriko diote musikak, kantuek eta bertsoek. Izan ere, talde ezberdinak aterako dira kaleak alaitzera. Hernanin, goizeko 09:30etik aurrera Kaxkoa erabat itxiko da trafikoarentzat.
Goizean egingo dute Astigarragara bisita biek, eta Santiomenditik jaitsita, 11:00etan iritsiko dira herrira. Foru Plazan elkartuko dira haurrekin, eta kalez kale ibiliko dira denak elkarrekin. Eta ondoren, udaletxeko balkoira igoko dira Olentzero eta Mari Domingi, haurrekin batera abesteko.
Zinkoeneatik kalejira, Musika Banda, Goiz Eguzki eta Kantuz abesbatza, Hernanin
Hernanira, berriz, arratsaldeko 17:00etan iritsiko da Olentzero, eta Kaxkoan barrena ibiliko da. Kalejiraren irteera Zinkoeneatik izango da eta kale-buelta musikatua hasiko du Ttarlako dantzariekin. Hauekin batera Galtzagorrien taldea, herburu Hernaniko Erraldoi eta Buruhandiak elkartea, Hernaniko Herri Musika elkarteko txistulariak eta Hernaniko dultzainariak irtengo dira. Plazara igota, bertan dantzatuko dute Ttarlako gaztetxoenek, eta segidan, 18:00ak aldera, haurren gutun eta muxuak jasoko ditu Olentzerok, 19:30ak arte.
Hori baino lehen, kale bueltan aterako dira Kantuz abesbatzako kideak ere, 12:00etan Milagrosatik abiatuta. Eta baserriz baserri ibiliko dira Iraulio Panttalone Bertso Eskolako kideak, Olentzero hartuta, arratsaldean, 16:00etatik aurrera.
Eta Olentzero Kaxkoan zehar ibili ondoren, Musika Bandako kideak izango dira, kale horiek alaituko dituztenak, 20:00etan.
Goiz Eguzki Abesbatza, Sandiusterrin
Goiz Eguzkiko Abesbatzako kideak, gaur goizez, Sandiusterriko zaharren egoitzara joango dira. Gabonak girotzeko asmoz, Gabon kantak eskainiko dituzte bertan eta, ondoren, kalez kale ibiliko dira.
Olentzerorekin bi kale buelta, goizuetarrek
Goizuetan, behin ez, bi bider ibiliko dira herriko kaleetan barrena, Olentzerorekin. Aurrena, goizeko 11:00etan abiatuta, Xalto eskolakoak aterako dira gabon eskean. DBH2koek ikas bidaia egin dezaten izanen da bildutako dirua.
Eta azkenik, Mari Domingirekin batera iritsiko da Olentzero, 18:30etan. Txino auzoan eginen diete ongietorria, eta herrian barrena ibili ondoren, goiko frontoian egonen dira.
Baina denetan goiztiarrenak aranoarrak izanen dira, goizeko 09:00etan jarri baitute hitzordua Suron. Olentzero hartuta ibiliko dira etxez etxe eta baserriz baserri, kantuan.
Eguberrietako kantak kantari ibiliko dira Aranon
Aranon ere gaur hasiko dituzte Eguberrietako ospakizunak eta Eguberri bezpera izanik, haurrek eta gurasoek kantuz alaituko dituzte herriko txokoak. Eguraldiak laguntzen badu, 09:00ak aldera gelditu, eta Olentzero bizkarrean hartuta, Suro auzotik abiatuko dira.
Handik Bentaberrira joanen dira, eta Latse eta Beheko Herritik pasa ondoren, eguerdirako Goiko Herrira hurbilduko dira. Eguerdian bazkaria eginen dute elkarrekin.
EGITARAUA
HERNANI
12:00 Kantuz abesbatza. Irteera Milagrosatik.
17:00 Olentzero eta Mari Domingiren etorrera. Zinkoenean.
20:00 Musika Banda. Gabon Gaueko erronda. Kaxkoan.
ASTIGARRAGA
11:00 Olentzero eta Mari Domingiren etorrera Foru Plazan.
GOIZUETA
11:00 Xalto eskolakoak irtengo dira Gabon eskean.
18:30 Olentzero eta Mari Domingiri ongietorria Txino auzoan.
ARANO
09:00 Olentzero eta Mari Domingirekin bizkarrean Surotik abiatuko dira.