Oso egun seinalatua da datorren igandekoa, Urumea bailarako bertsozaleentzat. Izan ere, Bertsolari Txapelketa Nagusiaren finala jokatuko da, Iruñeko Nafarroa Arenan; eta oholtza gainean izango dira bailarako lau ordezkari: Maialen Lujanbio hernaniarra, Aitor Mendiluze eta Beñat Gaztelumendi (Hernaniko Bertso Eskolako kideak), eta Nerea Ibarzabal, Hernanin bizi den markina-xemeindarra.
Hori horrela, finalari eskainitako ale berezia argitaratuko du Kronikak, larunbat honetan. Lau bertsolariei egindako elkarrizketak bilduko ditu bertan, eta baita bosgarren bat ere: Oier Iurramendi hernaniarrari egindakoa, Bertsolari Txapelketa Nagusiaren koordinatzailea baita bera.
Bost elkarrizketa horiek, gainera, 'Kronika.eus' webgunean argitaratuko ditugu aldez aurretik: aste honetan zehar, egunero bana. Goizeko 11:00etan argitaratuko dugu elkarrizketa bat egunero.