Indarkeria Matxistaren Kontrako Nazioarteko Eguna izan zen atzokoa; egun seinalatua, indarkeria matxistarik eta zapalkuntzarik gabeko gizarte batera bidean, guztiok elkarrekin pausoak ematen jarraitu behar dugula aldarrikatzeko.
Hori horrela, eta beste urte batez, Urumea bailara osoa jantzi zen morez, eta ohiuka zabaldu zituzten aldarrikapenak. Kontzentrazio eta manifestazio bana egin zuten Astigarragan, Udalak eta Emakumeon Etxeak antolatuta; eta beste horrenbeste Hernanin, Itaiaren eta Koordinadora Feministaren eskutik. Aranon ere egin zuten elkarretaratzea, Udalak deituta. Eta Goizuetan eta Ereñotzun, emanaldi bana antolatu zuten Kultura eta Emakume Taldeek eta Katiluzar Guraso Elkarteak, hurrenez hurren.
Ekitaldiak eta mezuak ezberdinak baziren ere, aldarria bera izan zen: argi adierazi zuten, indarkeria matxistarik eta zapalkuntzarik gabeko gizarte bat eraiki nahi dutela.
