Bukatu da Errigoraren aurtengo kanpaina, Bat egiteko garaia da lelopean; eta aditzera eman dutenez, 13.000 saski banatuko dituzte, Nafarroa erdi eta hegoaldeko dozenaka nekazarik bildutako uztarekin osatutakoak. Horietatik, 236 saski iritsiko dira Urumea bailarara: 176 saski eskatu dituzte Hernanin, 32 Goizuetan, eta 28 Astigarragan.
Saldutako saski guztiei esker, 200.000 euro bideratu ahal izango dituzte Ager zonaldeko euskalgintza egitasmoetara: bertako AEKren euskaltegietan bekak lantzeko, eskoletan D ereduko lerroak bultzatzeko, eta Agerraldia egitasmoaren baitan urte osorako agenda zabala osatzeko.