Bihar osatuko dute etxeko lasterketa magikoa, korrikalari gipuzkoarrek. 30.000 lagunek bizituko dute Behobia-Donostia barru-barrutik, eta horien artean izango dira Urumea bailarako dozenaka herritar ere. 187 izan ziren joan den urtean, baina ia 300 izatera ere iritsi dira azkeneko urteotan.
Goizeko 09:30etan abiatuko dira aurrenekoak, Behobiatik: gurpildun aulkietan doazenak. Bost minutu beranduago aterako dira patinatzaileak, eta korrikalarien txanda izango da gero. Eliteko neskak aterako dira aurrena, 09:55etan; eta segidan dortsal horia duten korrikalariak, 10:00etan. Hortik aurrera, multzoka aterako dira, kolore ezberdinetako dortsalekin, bakoitza dagokion orduan. 11:30etan abiatuko da azkeneko multzoa Behobiatik.
Behobiatik Donostiara, 20 kilometro egingo dituzte, azkeneko urteotako ibilbidearekin: Behobia, Irun, Gaintxurizketa, Errenteria, Pasai Antxo, Herrera, eta Mirakruz, Bulebarreko helmugara iristeko. Asko eta asko izango dira lasterketa barrutik bizituko dutenak; baina beste horrenbeste, edo gehiago, errepide bazterrean egongo direnak, etengabe animoak ematen. Horixe baita lasterketaren arrakastaren ezaugarri nagusietako bat: ibilbide osoan sortzen den giroa.
Eta zuk, lasterketan parte hartuko duzu? Animatzera joango zara? Bidali eguneko argazkiak kronika@kronika.eus helbide elektronikora! Txoko berezia eskainiko diogu Behobia-Donostiari, datorren astearteko alean; eta bertan argitaratuko ditugu zuen argazkiak.