Proba garrantzitsua izan zuten, etxe ondoan, bailarako ipar martxalariek. Urnietan jokatu zen Kopa Euskal-Nafarra igandean, eta bertan izan ziren bost hernaniar, bi proba ezberdinetan.
Kopa Euskal-Nafarrari zegokion proban hartu zuten parte Agustin Urretabizkaiak eta Arantxa Astigarragak, 11,6 kilometroko ibilbidean; eta maila ederrean aritu ziren biak. Bosgarren postuan helmugaratu zen Urretabizkaia, 1:15:14 denborarekin; eta 23garren Astigarraga, 1:22:53 denbora eginda. Emakumezkoen artean, zazpigarrena izan zen hernaniarra.
Proba irekian, berriz, hiru hernaniar aritu ziren, 7,7 kilometroko ibilbidean. Laugarren postuan helmugaratu zen Marijo Villalba, 55:24 denborarekin; eta bera izan zen aurreneko emakumezkoa. David Guirado, berriz, bederatzigarren izan zen (58:51), eta 35garren helmugaratu zen Olga Arranz (1:27:26).