Gipuzkoako Txapelketak ez du etenik, eta partidu garrantzitsuak jokatuko dituzte asteburu honetan, bailarako pelotariek. Astigarragan, Ekain eta Eñaut Lizeaga anaiek Tolosa izango dute aurkari. Gaur dute norgehiagoka, 10:00etan, Txomiñene frontoian.
Hernanin, Xabier Apaolazak eta Markel Lizeagak bihar dute hitzordua, frontoian. Ospeleko Orbegozoren eta Aranalderen aurka neurtuko dituzte indarrak. Partidua irabaziz gero, finalaurrekoak jokatzeko sailkatuko da bikote hernaniarra.
Probintziako txapelketan ere, bigarren kategoriako jubenil mailako Julen Deskargak eta Oier Azpeitiak gaur dute norgehiagoka. Lasarte-orian ariko dira, 17:00etan, Intzako Olazabalen eta Elosegiren aurka. Arerio zuzena dira Intzakoak, eta, azken fasea jokatzeko aukerarekin jarraitzeko, partidua irabazi beharko du Hernanik.
Txapelketa pribatuen finalaurrekoak asteburuan, Gartzaron
Txapelketa pribatuan, finalaurrekoak jokatuko dituzte asteburuan, C.D. Hernaniko zenbait pelotarik. Alebin mailan, Imanol Ormazabalek eta Oier Arsuagak bihar dute norgehiagoka, 10:00etan hasita.
Infantil mailan, Adur Otaegirekin jokatzen ari den Ekhi Osesek gaur du partidua, 16:30etan, Oberenaren kontra.