Bolako Taldekako Txapelketaren jardunaldi berri bat jokatu zen pasa den asteazkenean, urriaren 12an, eta larunbatean. Hernani eta Ereñotzuko hiru taldeak aritu ziren: Elur Txori, Ur Mia eta Hernani, eta gainera derbia izan zen, Hernanin, Elur Txori eta CD. Hernaniren artean. Bi taldeen artean zortzinako berdinketa izan zen, larunbatean, eta beraz puntu banaketa. Hiru egun lehenago Ereñotzuko Ur Miakoek Ategorrietan izan zuten jardunaldia eta ereñotzuarrek beste garaipen bat lortu zuten, 7,5-8,5. Ereñotzuko laukotea osatzen dute Leandro Minerrek, Iñaki Minerrek, Jose Mari Etxebestek eta Ibon Minerrek. Migel Arrozpidek, Jose Antonio Ugarteburuk, Mikel Arroiok eta Iñigo Arrozpidek osatzen dute Hernanikoa. Azkenik, Elur Txoriren ordezkariak dira: Benito Loitegi, Fernando Gallego, Fermin Zuloaga eta Rosa Santos.
Bolari guztiak elkarren aurka
Aurreneko fasean, sei tiraldi jokatuko ditu talde bakoitzak, azaroaren 13ra bitartean. Talde bakoitzaren aurka, behin etxean jokatuta eta behin kanpoan. Tiraldi bakoitzean, bolari guztiak elkarren aurka ariko dira txandaka.