Hiru partidu erakargarri izango dira gaur arratsaldean, bailarako futbol zelaietan. Batetik, Zubipen jokatuko dute Ohorezko Erregional mailako bi talde hernaniarrek; eta bestetik, mutilen Erregional Preferenteko derbia izango da Zarkumendegin, Mundarroren eta Hernaniren artean.
Nesken taldeak jokatuko du aurrena Zubipen, 15:30etan hasita; eta Urola izango du aurrez aurre. Beste garaipen bat nahi dute berdeek, liga hasiera bikainari jarraipena emateko, eta lidertzari eusteko. Segidan, mutilen taldeak jokatuko du, 17:30etan hasita, Amaikak Baten kontra. Hirugarren garaipenaren bila aterako dira berdeak, sailkapenaren goiko postuetan sartzeko.
Zarkumendegin, berriz, derbia 16:00etan hasiko da. Liga hasiera gogorrari buelta eman nahi diote moreek, Hernani menderatuta; baina ez daukate lan erraza, ondo ekin baitiote berdeek, hiru partidutik bi irabazita.