Ezin izan dio nahi bezalako hasiera eman ligari, Hernaniko mutil seniorren taldeak, Gipuzkoako bigarren mailan. Lehiakor aritu zen etxean, Pulporen kontra, larunbat arratsaldean. Partiduaren bukaera, ordea, garratza izan zen hernaniarrentzat: gol bakarreko aldearekin galdu zuten (27-28).
Hernaniko nesken taldeek lortu dituzte bi emaitza pozgarrienak, asteburuan. Neska jubenilek Arrasate menderatu zuten etxean, larunbat eguerdian (23-20), denboraldiko aurreneko garaipena lortzeko. Eta estreinako garaipena lortu zuten neska kadeteek ere, ostiral iluntzean Urnietan (17-20).
Kategoria horretan bertan, larunbat arratsaldean jokatu zuen Mundarrok etxean, Zarautzen kontra; baina nagusi izan ziren bisitariak (15-26), eta ezin izan zuten bigarren garaipena lortu moreek. Eta mutil jubeniletan ere, galdu egin zuen Hernanik etxean, igande eguerdian, Egiaren kontra (30-38).